公視新聞網 https://news.pts.org.tw/article/688831
花蓮68間學校受損 縣府按算連假期間拚修復
發布時間：2024-04-04 19:15 更新時間：2024-04-05 08:39
鍾依憓 邱紹揚 / 花蓮報導
https://www.youtube.com/watch?v=XyhXoyYFM70
這改地動花蓮受損害上嚴重。花蓮125間中小學中就有68間攏傳出災情。其中上嚴重的是
花蓮女中。其他的親像物件損壞、壁堵hiàu殼落落來等等，花蓮縣教育處表示會趁連假
趕緊整理，後禮拜一就會當正常上課。（此則新聞標題、導言、內文皆為臺語文。）
臺語台記者鍾依憓，【臺灣發生大地動，花蓮嘛有真濟校園攏受損，會當看著這支柱仔
規个已經必去，連鋼筋嘛攏歪去，是好佳哉無學生受傷。」
花蓮女中是這改地動，受損上嚴重的學校，校方表示，學校的大樓攏是合法的，過去地動
，嘛無發生遮爾嚴重的損害，這是頭一擺，目前當咧等待後續的拆除工程。
花蓮女中校長詹滿福，「這改是上大的一改，所以學校彼間大樓，因為四樓嘛足重矣，所
以伊承受不了，所以才按呢來崩落、無法度。」
毋過就有家長煩惱，因為綜合大樓離上課教室誠近，向望會當共施工的時間縮短，才袂影
去影響著學生學習。
家長黃文琴，「時間發生佇學期中間，所以課程猶是愛繼續進行，然後阮非常希望，是會
當較緊去拆除這个，這棟的綜合大樓。」
根據花蓮縣政府統計，花蓮縣攏總有125間國中、小學。這改地動，有68間學校傳出災情
，受損的情形，大多數是天蓬落落來，柱仔、鋼鐵歪去，磁仔落落塗跤等等，另外嘛有三
間學校請國軍鬥相共清理，其中水源國小較嚴重，因為是遮雨棚落去，面積大，較歹清，
目前花蓮縣校園災損金額，閣咧統計。
花蓮縣政府教育處代理處長翁書敏，「佇國中小學災損的部份，主要有天篷、輕鋼架落落
去，閣有學校的櫥仔物品落落去，佮倒去的部份，閣有設施設備的損壞按呢。」
花蓮縣教育處表示，這擺佳哉無學生囡仔受傷，另外中央嘛有補助一千萬，予學校會當做
修復經費，佇清明連假這規工會趕緊清理，才袂影響著連假過後的上課。
洪家馨/編輯