y公視新聞網 https://news.pts.org.tw/article/689170
蕭壠兒童藝術節活動 親子體驗蜈蚣陣佮藝陣
發布時間：2024-04-07 19:15 更新時間：2024-04-07 19:57
李晨宇 / 地方報導
https://www.youtube.com/watch?v=iZ8NpJ6bhmo
臺南佳里蕭壠文化園區，今年舉辦兒童藝術節活動，佮在地廟寺金唐殿合作，規畫陣頭體
驗，希望大眾會當更加了解咱臺灣的信仰文化。
家長共囡仔換衫，身軀頂穿的是蜈蚣陣神童的服裝，in欲扮做上天星神的樣，這種場景就
愛香科踅境才看會著。這陣蕭壠文化園區佇連假辦兒童藝術節活動，其中參金唐殿合作，
廟方提供十軀衫，另外館內，嘛有浸水式的藝陣展演空間，欲予囡仔用五感趣味的方式，
認捌陣頭的藝術佮文化。
囡仔：「阮進前有看過蜈蚣陣，嘛有去抾糖仔，毋過阮無去坐過，阮這改欲來體驗看覓。
」
家長：「坐彼蜈蚣，神明會保庇。」
蕭壠文化園區活動承辦人 陳繼珍：「(阮內底)有一寡像在地宮廟文化，閣有一寡家將，
阮在地的陣頭文化，會當閣較了解阮佳里區在地的陣頭。」
蜈蚣陣是古早曾文溪流域周邊廟宇特色的陣頭，主要過去沿海常在咧做大水，溪流嘛定咧
改道，這種現象在地人就共號做「青瞑蛇」。文史工作者講，相傳蜈蚣會鎮煞，尾手佇西
港、麻豆、學甲、蕭壠、佮土城香，攏通看著蜈蚣陣會佇香陣頭前咧辟邪。其中，金唐殿
的蜈蚣陣有201.8公尺，捌予金氏世界紀錄認證過上長的，計總108个上天星神來組成。
文史工作者 張明忠：「阮的王爺指示講，愛裝天罡地煞才有夠力，而且這天罡地煞是先
天的，就是封神榜內底108个天罡地煞。囡仔裝做天罡地煞的範，然後坐佇蜈蚣棚頂懸，
按呢來壓彼个煞才有夠力。」
各地攏有無仝的藝陣文化，蕭壠文化園指出，未來會繼續參在地廟宇做交陪，辦閣較無仝
型態的體驗活動，欲予民眾理解文化豐富的內涵。
陳稷安/編輯