公視新聞網 https://news.pts.org.tw/article/689342
"上下課時間顛倒反" 學校培養學生自主學習
發布時間：2024-04-08 19:15 更新時間：2024-04-08 19:37
https://www.youtube.com/watch?v=gWfDD_PTlB8
讀國小的學生，這馬一節課是40分鐘，下課10分鐘，配合臺北市舊年兒童節所推動的上下
課顛倒反的政策。明湖國小這個月就有揀一工來比照辦理，予學生仔家己規畫自由時間，
希望囡仔會當獨立思考，做一个會曉安排時間的人。
明明是上課時間，學校煞遮鬧熱，球場頂有一大陣囡仔咧耍球。這毋是體育課，是明湖國
小配合台北市四月份揀一工「上下課時間顛倒反」的活動。原底40分鐘老師提來上課的時
間，雄雄變做囡仔通家己規劃的自由時間，有人想欲去運動，有人想欲看冊，逐家攏真有
想法。
明湖國小學生黃翊捷表示：「頭一節課羽毛球，然後第二節課佇運動埕耍。」
明湖國小學生邱定謙表示：「我頭一節課原底，是我欲講遐的，關係著歷史上二戰的代誌
。」
明湖國小學生顏辰澔表示：「頭一節課是看冊，第二節是走相掠。」
學校透過事先調查、和家長溝通，發現毋管是幾年的學生，攏希望會當有較濟的運動時間
。另外，其中一、二年有人想欲紮tshit迌物佮同學分享，三、四年有的愛看影片，五、
六年有人想欲和老師佮同學開講。明湖國小老師認為，雖罔上下課時間顛倒反做起來蓋困
難，毋過對學生是有幫助的。
明湖國小教務主任林庭米表示：「予學生仔有機會，去選擇家己佮意的，以後才有機會伊
繼續學習，無的確會變做伊的專業。」
上下課時間顛倒反，除了是希望予囡仔耍予夠氣，也希望囡仔做一个會曉安排時間的人，
去培養囡仔獨立思考、決定、佮負責的能力。學生表示，in對這改的活動攏真滿意，嘛誠
期待下改家己規劃時間的機會。學校表示，望這改予囡仔做家己主人的活動，會當予in有
一个誠好的兒童節回憶。
陳玟芯/編輯