公視新聞網 https://news.pts.org.tw/article/691334
【涉己新聞】戲齣"火車來去"佇臺南開鏡 講人生離合悲歡
發布時間：2024-04-20 19:15 更新時間：2024-04-20 19:47
林緯廷 / 嘉義報導
https://www.youtube.com/watch?v=qYMjrgimVBA
【涉己新聞】公視台語台佮華視合作的台語戲劇「火車來去」，20佇台南岸內影視基地舉
辦開鏡儀式，這是一齣背景佇1982年，用台灣一个小鎮，來講人生悲歡離合故事的戲齣。
(這則新聞標題、前言、內文為臺語文。)
【涉己新聞】
眾人做伙攑香拜拜，祀求拍片的過程會當一切順利。公共電視台佮華視做伙聯合製作的新
戲劇”火車來去”，20中晝，舉辦開鏡儀式。
舊年牛車來去，用1940年代佃農一家伙仔的故事，佇金鐘獎得到好成績，導演李岳峰推出
來去系列第二齣的火車來去，欲向逐家講一个1982年代，發生佇一个小鎮的故事。
導演李岳峰：「較早出外來拍拚欲轉去故鄉，攏佇這个火車頭，有一个敢若悲喜的演出就
著，所以我是用這款較慢的步調，來演出過去的舊社會彼个人情味。」
這改演出的演員，除了有一寡頂一齣牛車來去的演員之外，嘛閣有加入新的演員，怹表示
，用台語演戲是一个挑戰，會拍拚講好台語。
演員侯彥西：「因為這是我第一齣。全部攏是愛講台語的戲，然後我台語其實不是誠
講，但是我拄仔拄著石知田了後才發見，佳哉我毋是台語上bái。」
演員 梁家榕：「我佮導演是20冬前，合作過「家」這齣戲，20冬後閣再合作，然後彼當
陣我講的是華語，我袂曉講台語、嘛袂曉聽，所以導演這改就問，梁家榕你敢會曉講台語
，我這馬會曉聽、會曉講。」
導演表示，二月的時陣就已經來到台南岸內影視基地搭布景，遮環境真四序，希望會當拍
出精彩的作品，予觀眾看好戲。
張曼亭/編輯