公視新聞網 https://news.pts.org.tw/article/691755
黃晴美文獻展 了解「刺蔣案」女性戰士
發布時間：2024-04-23 19:15 更新時間：2024-04-24 08:31
呂尚儒 莊浚佑 / 地方報導
https://www.youtube.com/watch?v=gapt8cOctkY
臺灣戒嚴時期海外的臺灣智識份子，有真濟想欲追求臺灣民主獨立的聲音，特別是1970年
4月24「刺蔣案」佇美國發生了後，閣較予國際看著臺灣人，追求民主自由的決心。其中
有一位真重要的女性，也就是銃手黃文雄的小妹─黃晴美，伊除了參與行動規畫，後續的
救援事工嘛攏靠伊。有民間團體為著欲予愈濟人了解這位女性戰士，和刺蔣案的關係，特
別為伊辦文獻展。(這條新聞導言、標題、內文是台語文。)
今年是刺蔣案54週年，1970年4月24，當時為著欲追求臺灣的民主獨立，佇美國留學的黃
文雄開銃欲刺殺蔣經國，尾手失敗連同策畫者之一的鄭自才，被當場逮捕。這个刺蔣案，
猶有一位關鍵的行動者，就是黃文雄的小妹、鄭自才的牽手，黃晴美女士，伊除了參與行
動規畫，後續的救援事工嘛攏靠伊，煞罕得有人知影伊。
二二八國家紀念館執行長 藍士博：「黃晴美女士佇咧事件中間來講，會使講扮演一个非
常重要佮關鍵的女性角色。過去嘛誠可惜，咧咱的歷史課本抑是講一寡材料來講，攏較罕
咧共介紹。感覺講其實咱愛予閣較濟的人，熟似講咱臺灣女性雖然講細粒子，毋過伊的力
量嘛誠大，會使為咱的社會，為咱的臺灣，會使帶來足大的改變。」
後來黃晴美為著欲共規个事件記錄落來，自2001年佇台文BONG報，開始刊刺蔣案一系列的
台語文章。為著欲予愈濟人了解黃晴美，四二四基金會特別為伊辦文獻展，除了展出當時
國際救援的手稿、嘛包括伊的台語創作。
四二四教育基金會董事 陳豐惠：「黃晴美女士雖然是讀英語出身，就是講伊是英語系的
，然後伊落尾佇瑞典，嘛是做瑞典語的老師等等。毋過伊一直無放袂記得伊家己的母語台
語，所以伊真堅持講寫424事件，愛用伊家己的母語來寫，這嘛是以台語的角度來講，當
然這是足寶貴。」
黃晴美一生關注臺灣的民主運動，嘛積極參與政治犯人道救援，這改的展覽辦佇臺北二二
八國家紀念館，展出到5/2，四二四教育基金會希望透過遮的珍貴史料，予社會閣較了解
刺蔣案當中的女性戰士，後續這个展覽嘛會佇臺灣各地舉辦。
陳稷安/編輯