公視新聞網 https://news.pts.org.tw/article/691964
臺南大學研發台語AI機器人 用影像教學效果好
發布時間：2024-04-24 19:15 更新時間：2024-04-25 08:32
https://www.youtube.com/watch?v=9xGW7li-JZw
臺南大學往過捌研發機器人，會曉參人用台語開講，這陣in閣有新的研發，就是講台語予
AI機器人聽，就會當隨產生對應相片予咱做學習。研發團隊嘛實際到國外發表，教授講，
外國人用圖像化的方式學台語，會加真緊，效果真好。
對機器人講台語，無幾秒鐘連鞭做出一張圖送予你。無看毋著，這隻不止仔厲害的機器人
閣出現矣，本成干焦會曉參人講母語做練習，這陣伊有新的功能，就是用AI產生影像，予
人會當用看圖的方式學習臺語增加印象。24臺南大學開放予囡仔搶頭香做體驗，毋但心適
閣增加IN學習的動機。
臺南市仁德國小學生表示：「機器有英語、台語佮AI，這台機器人若佇學校上課按呢真好
。」
臺南市仁德國中學生表示：「阮咧講台語閣會袂輾轉，有這種幫助是足好的，就是會當予
阮學生的台語閣較好。」
臺南市仁德國小校長 李培瑜表示：「教學的部份，低年級中年級高年級，阮攏會當加入
按呢生成式AI影像教學了後，我相信囡仔的印象會較深刻。」
這是台南大學產學合作的成果，教授表示，咱若參機器互動，伊自然就會共聲音做運算，
尾手機器會用倚本土味的語句抑是圖片做回應。機器人毋但會曉台語爾，英語嘛會通，研
發團隊日前去香港、日本等國家發表。IN講，外國人用按呢學習，干焦餾三擺就學會曉講
臺語的詞彙。
國立臺南大學資訊工程系教授，李健興表示：「(阮)發覺講毋管是馬來西亞的老師佮學生
，抑是日本東京的教授，in學台語攏學了真緊。這對咱臺灣是一个優勢，咱會當共咱臺灣
遮的文化、母語推去全世界，予全世界攏知影咱台語，其實是一个誠媠的語言。」
目前這套系統愛連網路，研發團隊按算未來欲直接佇機器內設GPU，予學生佇任何所在攏
會當使用。另外in嘛參出版社合作，予AI科技運用佇咧各年級的母語課程，提升學生學母
語的意願。
記者 李晨宇 臺南報導
陳怡臻/編輯