公視新聞網 https://news.pts.org.tw/article/692667
推觀光.動保 猴硐貓公所成立."銅鑼燒"做所長
發布時間：2024-04-29 19:15 更新時間：2024-04-29 19:40
https://www.youtube.com/watch?v=0-Z6IjFHujA
新北市瑞芳的猴硐，是世界出名的貓仔村，2021年開始，新北市動保處就成立「貓仔公所
籌備處」，遮的貓仔攏有戶口，方便管理，今猴硐的貓仔公所正式成立，閣選出貓仔公所
的所長。
去予人結一个tsiú-tsiú，這隻是拜一升官做猴硐仔貓公所所長的「銅管仔餅」。猴硐
仔的貓世界有名，遮也捌去予CNN揀做世界六大看貓仔的景點之一。2021年，新北市動保
處佇遮成立「貓公所籌備處」，將猴硐仔的野生貓仔入戶口、做登記管理，也提供絕育、
醫療、認養等等服務。拜一貓公所正式成立，新北市農業局表示，希望遊客毋但佮意貓仔
，也愛學習正確的互動方式。
新北市農業局局長，李玟表示：「希望講咱遊客、咱蹛遮的(村民)、咱所有的人佮意貓仔
以外，嘛愛來遮了解講，按怎飼貓仔，佮貓仔做伙，上重要的是講，咱愛認養莫放sak。
」
猴硐仔貓公所是新北市其中一个認養點，毋但是猴硐仔，其他所在若有適合認養的貓仔，
也會送來這爿予有興趣的民眾認養。新北市動保處表示，除了提供認養服務，動保教育原
仔真重要，這改公所成立，in嘛揣少年人團隊合作，設立電子的導覽裝置，遊客毋但通對
地圖熟似猴硐仔的貓仔，也通透過趣味的操作，了解和貓仔互動時愛注意的代誌。
梅鹿勇青年團隊，郭武嚳表示：「咱會當透過揤貓仔的方式，像講咱揤貓仔的頭抑是貓仔
的尾溜，或者是講一寡其他的所在，伊無爽快，阮可能會顯示一寡提醒的訊息，提醒民眾
講毋通按呢共摸，in可能會無佮意。」
新北市動保處表示，誠歡迎逐家來猴硐貓公所認養貓仔，毋過千萬毋通來遮放sak貓仔。
in也表示，今年日本熊本縣上天草市已經和瑞芳區簽署交流協定，也指定來猴硐仔遮參觀
，猴硐仔已經沓沓仔成做世界模範貓仔村，希望未來透過濟濟的交流和觀光發展，提升動
物的認養率。
記者 劉芯瑀 謝季潾 新北報導
陳怡臻/編輯