公視新聞網 https://news.pts.org.tw/article/693783
高雄瑞隆路新畫人行道 煞予機車違規占滿滿
發布時間：2024-05-07 11:59 更新時間：2024-05-07 13:49
鍾依憓 邱紹揚 / 高雄報導
https://www.youtube.com/watch?v=4JKp5FZPz2M
高雄市這幾冬推動標線型人行道，到今已經完成91搭，其中上長的標線型人行道佇前鎮的
瑞隆路，毋過這八百米長的綠色人行道猶未完工，就有規排的oo-tóo-bái亂停，致使民
眾攏袂當行，交通局表示工程完工了後會加強宣導，嘛會共人行道隔開。（此則新聞標題
、導言、內文皆為臺語文。）
看著高雄瑞隆路，規排的塗跤有畫綠色的標線型人行道，毋過頂懸的機車是停甲滿滿滿，
致使過路人干焦會當行對邊仔的道路，看起來真危險，民眾就講，新標線的工程猶未完工
，機車就停規排，政府愛加強宣導才對。
民眾，「停佇遮，人咧行嘛是愛行外口，嘛是佮車行做伙，所以嘛是危險，所以我感覺講
，逐家公德心嘛是愛有按呢。」
民眾，「比較進前無設，是較有一寡幫助，就是愛宣導人民講，愛停佇人行道以外。」
這條瑞隆路有18米闊，兩爿攏有畫1米2的人行道，總長有800米，是高雄市上長的標線型
人行道。目前高雄已經有91搭標線型人行道，毋過民團認為亂象嘛真濟，親像三民區的鼎
勇街，毋但闊度無夠、甚至中央閣有電火柱仔，民團理事長表示講，按呢的設置對家長甚
至坐輪椅的序大攏無方便，仝款危險。
高雄市行人路權促進會理事長林于凱，「這馬咱有長輩坐彼種電動的代步車，攏愛佇人行
道頂懸，問題人行道頂懸足濟障礙物， in攏無法度行」
高雄市政府交通局副局長 劉建邦，「設交通杙、共標線型人行道佮停車帶，閣有車輛通
行的空間，做一个分開等等，阮攏會接續滾動檢討做設置。」
針對標線型人行道路障的問題，交通局頂個月會同相關單位會勘，未來會拓寬人行道，另
外瑞隆路標線型人行道予機車占用，交通局表示，初8就會完工，未來會考慮設阻隔的設
施，予民眾知影，車愛停佇人行道白線以外，用路人才會當較安心。
洪家馨/編輯