公視新聞網 https://news.pts.org.tw/article/695429
臺南校園巡迴推台語戲劇 望提升囡仔母語能力
發布時間：2024-05-16 19:15 更新時間：2024-05-17 08:36
李晨宇 / 臺南採訪報導
https://www.youtube.com/watch?v=SbtaEJsMG8Y
臺南市教育局為著欲共台語向下釘根，佮南瀛故事人協會合作，用趣味的戲劇予囡仔自然
接觸台語，提升母語能力。協會講今年in總共會去十間學校演出，向望未來有機會通湠去
外縣市，予母語繼續流傳落去。（此則新聞標題、導言、內文皆為臺語文。）
縣老爺便若出現就欲共百姓討錢，食銅食鐵的行為逐家咧欲驚死。尾手有螿蜍提出聚寶盆
來救助，才順利化解危機。這齣財神來矣，是南瀛故事人協會今年度台語戲劇巡迴列車的
戲齣，劇團佇內底加入真濟俗語參舞蹈的元素，打造沉浸式的母語環境，台跤的囡仔攏真
投入，那看戲那綴咧學講台語。
臺南市通興國小囡仔，「足濟演員佇舞台頂表演，我感覺這齣戲足好看的，希望後一改in
閣來表演。」
臺南市通興國小囡仔，「演員咧講台語，我嘛會學足濟台語的」
南瀛故事人協會理事長沈采蓉，「阮佇校園咧走，足濟囡仔攏袂曉講台語 抑是in聽無，
囡仔透過這个戲劇的表演，in就會參咱有一寡聯繫抑是互動的部份，我就感覺這嘛是一个
推廣台語足好的方式。」
教育局連紲三冬參協會合作，共台語戲劇蹛入校園，今年會去十間國中小做演出。其中，
戲團內底有兩个信義國小的囡仔嘛加入成做演員，用紲拍台語參逐家互動，IN就向望少年
輩嘛通參in仝款，共母語抾倒轉來。
臺南市信義國小囡仔 黃仕權，「這馬的囡仔就足少講台語的，所以我希望我會當藉由這
个戲劇，來予囡仔有興趣講台語。」
臺南市通興國小校長 張吉宏，「囡仔看一寡角色咧講台語，佇生活中接觸著台語，其實
對in來講，嘛是一種真無簡單的學習體驗。」
目前劇團攏佇臺南地區做巡演，IN希望未來有機會通共劇團延伸去外縣市，拚勢共寶貴的
爸母話繼續傳承落去。
洪家馨/編輯