公視新聞網 https://news.pts.org.tw/article/696373
臺南四草溪邊欲起飯店 在地煩惱損害生態
發布時間：2024-05-22 19:15 更新時間：2024-05-23 08:39
https://www.youtube.com/watch?v=XyN2MQDnkZQ
臺南安南區的四草，有全臺灣唯一的水上綠色河道，真濟遊客真愛來遮觀光。毋過附近煞
有人咧起大型的飯店，在地民眾認為按呢會損害景觀和生態。業者表示，in攏有照環境影
響評估的規定落去做，嘛強調會加強環境的綠化。（這條新聞標題佮前言是台語文。）
兩爿青錦錦的的海茄苳，人親像佇樹林內仝款，遮予人號做是「台版亞馬遜河」的四草綠
色隧道，唌濟濟人來坐船仔看美景。毋過有民眾反應，這馬坐踮船頂，煞遠遠就會當看著
邊仔咧起大型旅館，IN認為破壞原始的景象，變甲無自然。其實，旅館起頭欲起的時，在
地人贊聲望帶動地方發展，這陣有議員接著居民陳情，驚在地生態受著衝擊。
民眾，蔡先生表示：「看著遐建築物攏遐濟，這馬就較無像原早較原始按呢。」
臺南市議員，蔡麗青表示：「起飯店佇咧國家級濕地頂懸，造成咱環境佮生態破害，咱會
要求飯店出來負完全的責任，予咱四草大眾廟亞馬遜河，會使繼續永續經營。」
四草大眾廟委員，周克斌表示：「建商彼陣仔嘛有講，邊仔欲做隔離的綠帶，是毋是這个
部份會使提早來做。」
這條有百冬歷史的隧道，總長900公尺，生態真豐富。針對附近開發案的爭議，業者回應
，工程攏照當初環境影響評估的內容落去做的。嘛掰會講，設計圖本成就有規劃佇隧道彼
爿加強綠化，只是猶未做好勢爾。市府表示，除了會嚴格把關旅館登記，到時嘛會邀請相
關單位到場會勘。
開發業者表示：「當地的居民佮業者有咧反應，阮的進度會調整成綠色磅空彼爿的植物，
阮會先來做，我遮工地排程排起來，上緊這个喬木做起來，按算11月左右會使完成。」
臺南市觀旅局觀光技術科科長，陶國隆表示：「未來若欲向本局申請旅館業登記，本局會
每一个做核對相關允准事項，敢是攏有辦理完成，愛攏無問題，才會核發旅館業登記證。
」
這棟佔有六甲地的渡假村型旅館，工程按算上緊愛明年才會完工。市府強調，遮是全臺唯
一的水上綠色隧道，會以生態長期發展做考量，IN向望業者愛兼顧地方發展，避免損蕩著
原始環境。
李晨宇 臺南報導
陳怡臻/編輯