公視新聞網 https://news.pts.org.tw/article/696765
陳澄波文化基金會 推尪仔冊"集合!"說臺灣故事
發布時間：2024-05-24 19:15 更新時間：2024-05-24 19:52
https://www.youtube.com/watch?v=pVdQKl3VNNY
臺灣畫家陳澄波的大孫-陳立栢，佇國外生活欲40年，十外年前轉來臺灣扞陳澄波文化基
金會，伊一直攏真拍拚咧做文化教育的事工，嘛對2022年出版一部號做"集合！"的漫畫，
拍算用20年的時間，欲推出120本，來講臺灣的故事，到今已經出到第十集，基金會嘛揣
廣播電台合作，共漫畫的內容全部配做台語，囥佇Youtube和逐家分享。
「阮接著情報，讀冊會內底有叛亂份子，請你綴阮轉去協助調查，叛亂份子?!我毋是叛亂
份子!校長緊共講我只是學生啊!」
主角因為去予人舉報是叛亂份子予警察掠去，這是對白色恐怖受難者張常美的故事改編來
的。這部漫畫就號做"集合！RENDEZVOUS"，是陳澄波文化基金會出版的，這馬共尪仔冊配
音做台語囥佇Youtube免費和逐家分享。
陳澄波文化基金會董事長陳立栢講:「這塊跤踏地的身世，咱袂使放予袂記得，怹若開始
對遮的有趣味，怹閣有想欲去了解講，台語欲按怎講，咱有準備講，好，遮便便，你馬上
會當聽著。」
"集合！"這部尪仔冊以奇幻冒險結合臺灣歷史為主題，有講咱第一位奧運選手的故事、也
有講早前臺灣掠海翁的商業發展，故事真豐富。另外，為著欲予愈濟人來接觸台語，基金
會和廣播電台合作，特別揣一般的民眾來參與台語配音。
電台表示配音的人來自臺灣各地，除了會當用家己自然的方式講台語，逐家嘛攏真歡喜會
當了解著濟濟臺灣的故事。
戀戀曾文溪廣播電台台長賴嘉仕講:「伊誠用心，伊共咱臺灣的歷史，包裝佇咧一寡較，
怹家己編的故事，一寡較奇幻的，我感覺講按呢會當吸引一寡較少年輩的可能有機會予
來看。」
陳澄波文化基金會表示，"集合！"這部尪仔冊，欲用20冬來推出120本，今年第三冬已經
出10本去，佇CCC追漫台就看會著，怹嘛當咧規畫講欲用3冬至5冬來做成動畫電影，嘛希
望會當共臺灣漫畫的品牌做起來sak去到國際。
張曼亭/編輯