公視新聞網 https://news.pts.org.tw/article/696764
慶祝創刊140週年 台灣教會公報社推印刷體驗
發布時間：2024-05-24 19:15 更新時間：2024-05-24 19:56
https://www.youtube.com/watch?v=1sNrCe10_Rs
全臺灣啟用印刷機出版頭一份報紙，是台灣基督長老教會的台灣教會公報，對1884年到今
，猶閣有咧發行，今年是創社140週年，特別製作紀念枋，欲予鄉親來體驗抾鉛字去印刷
的過程，嘛通了解這片土地的文化歷史。
囡仔提攄仔先共墨水用予齊，才閣囥入印刷機內底硩予峇，無偌久這張英國國歌的歌詞就
印好勢矣。這是1884年5月24台灣教會公報社開工試印的頭一張內容。公報社成立到今140
週年，復刻當時全臺頭一台印刷機，閣做一塊紀念枋，欲予逐家那體驗，那認捌早前先民
抾鉛字排活版的印刷過程。
家長郭小姐講:「遮是臺灣第一間報社，所以tshuā囡仔來體驗。」民眾溫先生講:「閣較
了解咱臺灣人以早的故事佮歷史，袂使放袂記咱家己的歷史。」
台灣基督長老教會台灣教會公報社，原名號做聚珍堂，是全臺灣發行報紙的起頭。報社總
編輯講，當初攏用教會白話字編輯出版，毋過佇國民政府時代予禁止發行。後來政策改變
，致使尾手報紙攏用漢字來呈現。這陣猶原逐禮拜出刊，為著兼顧母語的傳承，攏會佇副
刊囥各族群的文學作品。
民眾張小姐講:「台語這馬已經漸漸咧無去，囡仔嘛(足濟)袂曉，所以伊是一个予你感覺
講，咱的台語閣有人咧推廣。」台灣教會公報社總編輯陳逸凡講:「(巴克禮牧師)講孔子
字真oh，就是這个漢字咱若欲學愛開足濟時間，幾若冬可能你才會曉讀一篇文章，但是這
个白話字就是教會羅馬字，誠簡單就會學會曉，你會曉講話的人，較巧的，三禮拜就學會
曉矣。」
台灣教會公報，毋但紀錄臺灣早期的文化歷史，嘛見證近代民主政治的發展過程。這陣怹
有打造展示館，向望成做文化交流的平台。
張曼亭/編輯