公視新聞網 https://news.pts.org.tw/article/698450
大同病院、中山大學合作 用AI檢查出腰子結石
發布時間：2024-06-04 19:15 更新時間：2024-06-05 08:37
鍾依憓 邱紹揚 / 高雄報導
https://www.youtube.com/watch?v=79jxlwIxDf4
根據泌尿科學會統計，臺灣每十个人當中就有一位會有結石，高雄市立大同病院佮中山大
學合作，研發AI腰子結石篩檢系統，若輸入病患尿佮血的檢驗數據，就會當知影身軀內面
敢有結石，正確的比率有九成，這項發明嘛提著國際學會上懸的榮譽。（此則新聞標題、
導言、內文皆為臺語文。）
護理師當咧替民眾抽血，等咧閣愛驗尿，這毋但是一般健康檢查的流程，這馬有遮的資料
，就會當連鞭知影家己敢有結石，這套大同病院研發的AI腰子結石的篩檢系統，干焦輸入
病患的身懸、體重、尿佮血的數字，系統就會當精準的判斷，病患敢有腰子結石，正確率
有91%，目前系統使用一禮拜，已經揣出8、9位結石的患者。
高雄市立大同醫院泌尿科醫生陳浩瑋，「抽血驗尿，阮用遮的上基本的一寡項目，輸入到
阮開發的AI軟體內面，阮就會當算出病患身體內面，敢有腰子結石的機率到底是偌濟。」
根據泌尿科學會統計，臺灣十个人內面，就有一个有腰子結石，查埔的比例比查某較濟二
倍，大同病院佮中山大學，做伙研發這套AI腰子結石篩檢，過去結石患者攏愛等到會疼，
才會去看醫生，這馬有這套系統，會當篩檢出隱藏的患者，冗早治療，減少病患的病疼。
中山大學電機系博士生 魏培修，「高醫體系總共大約八千位左右的病人，建置阮的資料
庫，利用這个資料庫，阮會當馬上共病人的數據輸入了後，阮就會當知影這个病人，到底
敢有得著腰子結石。」
陳浩瑋醫生表示，這是全球頭一个運用AI科技來篩檢腰子結石，這嘛得著歐洲泌尿科醫學
會的肯定，對全球六千篇的研究當中，陳浩瑋是亞洲頭一位得著臨床上有貢獻獎的醫生。
洪家馨/編輯