公視新聞網 https://news.pts.org.tw/article/699780
93歲國寶藝師施朝養 是咱頭位車鼓陣保存者
發布時間：2024-06-12 19:15 更新時間：2024-06-13 08:36
https://www.youtube.com/watch?v=duq0xp__p5A
彰化有一位93歲國寶級的車鼓陣藝師-施朝養，伊十外歲就開始綴老爸學車鼓陣，是彰化
縣無形文化資產傳統表演藝術類－車鼓陣的保存藝師，嘛是全臺灣頭一位登錄「車鼓陣」
的保存者。就有學生特別來拜訪老師，看表演也體驗車鼓陣，希望予囡仔了解臺灣的傳統
表演藝術。
手提葵扇學阿婆仔行路、閣有阿公托枴仔，共逐家弄甲笑咍咍，這位是93歲的國寶級的車
鼓陣藝師－施朝養，搬啥物成啥物的功夫，也予頭擺看著車鼓陣的囡仔人真欽佩
學生講:「阿公搬的角色真成，所以我感覺足厲害。」、「我較早無看過車鼓陣，這馬看
著阿公表演，我感覺足趣味。」
車鼓陣是一項結合音樂、舞蹈、戲劇的表演，施朝養藝師十外歲就開始綴爸爸學車鼓陣，
表演功夫十全，是彰化縣無形文化資產、傳統表演藝術類－車鼓陣的保存藝師，嘛是全台
灣頭一位登錄做「車鼓陣」的保存者，臺灣傳統技藝推廣協會就和學校合作，☒學生來拜
訪藝師、認捌車鼓陣
彰化縣傳統表演藝術車鼓陣保存者施朝養講:「咱這个車鼓陣，就是愛唱歌，閣愛有咧講
話才會行，車鼓是屬於南管，南管攏有短曲，短曲佇咧跳的時陣，就愛唱這个南管曲。」
台灣傳統技藝推廣協會理事長楊玉如講:「車鼓陣足濟人無熟似，想講利用這个時間，阿
公會使佮逐家互動，做伙講講笑笑，予囡仔知影講車鼓陣是遮爾無簡單的代誌。」
學校表示，有這遍的拜訪經驗，未來欲予學生，創作一本施朝養藝師的繪本，共國寶級的
車鼓陣表演，一筆一畫紀錄落來。
施朝養最後嘛予逐家祝福:「我來祝各位逐家，身體健康，滿面春風子女滿堂，五代同堂
。」
張曼亭/編輯