公視新聞網 https://news.pts.org.tw/article/699989
臺南玉旨武玄壇爭議不斷 今閣煏違建、偷走稅
發布時間：2024-06-13 19:15 更新時間：2024-06-14 08:35
李晨宇 / 地方報導
https://www.youtube.com/watch?v=0fLhSR56E3M
臺南仁德有一間私人壇武玄壇，進前去鹿耳門天后宮進香，毋過海報煞寫講，關聖帝君參
媽祖欲辦「合婚」大典，引起爭議。這馬就有人煏講，武玄壇的建築物是違法的。市政府
調查了後，確實有違規，要求限期改善。（這條新聞導言、標題、內文是台語文。）
看這棟青色的建築物，真明顯並邊仔的厝加懸誠濟。這棟一樓這陣成做私人壇咧使用，有
民眾檢舉這間臺南玉旨武玄壇三樓以上是違法建築，工務局調查了後證實講部份是違建，
會要求IN限期改善。
投訴民眾：「伊原本應該干焦兩層樓，IN加起到三樓而且閣起到後壁去，應該是愛參邊的
四號仝款，然後伊閣對邊仔往頂面起起去。」
臺南市工務局副局長 王建雄：「阮清查伊佇二樓以下是合法的建築物，毋過其他部份是
違建。有關違建部份，阮會依臺南市政府違建處理的要點來辦理。」
除了違建，另外壇內的這張服務項目的價數討論度嘛真懸。無論是點燈抑是補財庫等價數
攏列甲清清楚楚，猶毋過這煞牽涉著偷走稅的疑慮。這間私壇的爭議到今袂收煞，主要因
為日前IN大主大意貼出海報，宣傳關公佮媽祖欲去鹿耳門天后宮進行合婚大典，予天后宮
佮媽祖信徒誠不滿，這馬閣煏出違規的代誌。實際到壇內IN無欲接受訪問，目前干焦透過
律師事務所發三點聲明，嘛向大眾會失禮。
捷泰法律聯合事務所律師 陳魁元：「阮只是法律顧問，伊猶未正式決定欲提告。這只是
一个聲明，希望這件代誌，逐家莫閣有超出法律界限的行為。」
民政局表示，武玄壇是無經過政府立案登記，IN強調準講是有立案，也袂使共民眾烏白亂
收錢，稅務單位會去調查這間私壇敢有偷走稅，市府後續會去輔導IN成做合法登記。
陳稷安/編輯