公視新聞網 https://news.pts.org.tw/article/701460
用本土語導覽生物多樣性 科教館講台語紹介蜂
發布時間：2024-06-23 19:15 更新時間：2024-06-24 08:44
https://www.youtube.com/watch?v=KLVklLSTYFI
母語出頭天！臺灣科學教育館最近接著真濟民眾來探問講，敢有台語抑是客語的導覽。所
以這馬嘛是第一改，安排用台語來講蜂的生態。有家長是認為講，用台語來講生物、講科
學真有意義。科教館嘛表示，會閣繼續辦落去。（這條新聞標題、導言、內文是台語文。
）
老師用台語解說蜂的種類，遮是科學教育館用台語紹介蜂的活動，tshuā囡仔來參加的家
長講，真濟生物或者是科學方面，專門的名詞用台語定定毋知欲按呢講，所以感覺按呢的
活動真有意義，囡仔嘛透過親身去體驗，對蜂有閣較濟熟似。
學生：「但是我毋捌對蜂岫直接挖(蜜)起來食，感覺足好耍的。」
家長 Aki：「足罕得看著(台語講蜂)，所以這改一開放報名，阮就趕緊搶，趕緊報名。較
專業的部份，阮希望予囡仔知影咱台語，嘛會當學著足濟專業的智識。」
科教館對三年前開始開放蜂花園做生物多樣性教育，這改佇民眾的要求之下，開辦蜂的台
語導覽，負責解說的蜂類保育協會理事長講，伊嘛是第一改用台語講蜂，為著按呢，伊閣
家己去研究一寡蜂類的台語，雖然講了無輾轉，但感受著佮民眾做伙學習的趣味。曷若是
專業的智識方面，伊講，導覽上主要是欲予民眾了解，蜂對人類的重要性，以及教民眾好
好仔佮蜂鬥陣。
臺灣蜂類保育協會理事長 蔡明憲：「親像咱拄仔介紹的時陣，足濟囡仔佇邊仔，伊蜂嘛
足乖的。所以就是想欲共逐家講，邊仔有蜂的時陣，你就予伊做工課就好，莫去想講欲用
藥仔去濺，攏莫按呢。」
一般佮科學有關係的活動，濟濟臺灣人是慣勢用華語抑是英語來表達，科教館講，親像這
款台語、客語等本土語言的導覽紲落來會繼續辦理，歡迎逐家做伙來用母語學科學。
陳稷安/編輯