公視新聞網 https://news.pts.org.tw/article/702233
少年人傳承鉛字工藝 發明細台的鉛字印刷機
發布時間：2024-06-27 19:15 更新時間：2024-06-27 19:44
呂尚儒 莊浚佑 / 臺北報導
https://www.youtube.com/watch?v=8xURJoXE9nE
行入電腦印刷的時代，鉛字活版印刷對逐家來講可能是干焦出現佇歷史課本的古早技術。
佇台灣嘛干焦賰台北的日星鑄字行猶有咧做鉛字。為著欲共古早工藝保存落來，有一个少
年家-顏宏霖，伊就發明細隻的鉛字印刷機，予民眾隨時會當提鉛字家己印名片、做卡片
。（此則新聞標題、導言、內文皆為臺語文。）
規排櫃仔頂頭攏是鉛字，這个所在是臺北的「日星鑄字行」，自1969年成立到今，是臺灣
唯一猶有咧做活版印刷需要的鉛字的所在。抑若日星的對面，有一个少年頭家顏宏霖開的
「一間印刷行」，伊講大學的時，捌去日星實習過，看著鉛字印刷通保存到今，這種傳承
傳統工藝的使命感，予伊真感動，伊嘛開始想講欲按怎予這款傳統印刷繼續保存落去。
一間印刷行頭家 顏宏霖
若欲去用彼个鉛字
干焦會當叫專門的印刷廠
就是用足舊的印刷機 足大隻
彼一般人就無法度用
所以想講我嘛是讀建築佮設計的
想講會當開發一隻較細隻的
會當予所有的人攏會當去用伊的字
顏宏霖講佇這馬電腦印刷的時代，鉛字活版印刷已經強欲失傳，若準鉛字的功能，干焦賰
予人買來當做紀念品，伊感覺真可惜。所以伊就發明細隻的印刷機，民眾若去日星鑄字行
揀鉛字、買來，就通順紲佇伊遮印家己想欲愛的物件。
一間印刷行頭家 顏宏霖
活保存就是予伊
用佇本底就應該用的所在
但是阮這這个機器就是去發揮伊
本底的用途
人客來到遮，毋但會當印家己想欲愛的卡片，顏宏霖嘛為人客設計無仝的名片排版，而且
連紙也會當家己動手做。佇現場當咧做名片的民眾嘛表示，真佮意這款手工的感覺。
民眾 林小姐
是真佮意
佮意in佇無仝材質頂頭
出現紋理的感覺
會感覺較有溫度
顏宏霖表示民眾若是有想欲做的字抑是圖樣，攏會當專工做，伊嘛猶咧思考欲用無仝款的
方式，予愈濟人接觸這款古早的鉛字印刷，予傳統工藝繼續活佇民眾的生活當中。
洪家馨/編輯