公視新聞網 https://news.pts.org.tw/article/702763
高雄大樹發現拋荒的磅空 地方調查歷史用途
發布時間：2024-07-01 19:15 更新時間：2024-07-01 19:36
鍾依憓 邱紹揚 / 高雄報導
https://www.youtube.com/watch?v=4-M3mK4_Sxs
高雄大樹往過若落大雨，攏會造成田裡淹水，當地里長調查水源，無意中佇山溝發現一座
日本時代的磅空，到今保留甲誠完整，懷疑是早期運糖的五分車會經過的，當地序大是認
為磅空是予牛車行的，地方希望繼續調查歷史，活化這个文化資產。（此則新聞標題、導
言、內文皆為臺語文。）
綴里長跤步，往小路行到底，是一片荒郊野外，內底竟然有磅空藏佇遮，遠遠看磅空內底
有夜婆，嘛看無磅空的盡磅，里長懷疑遮是五分仔車會經過的磅空，毋過地方有序大認為
，這磅空可能欲予牛車經過，因為過去日本人為著去高屏溪載砂仔起自來水廠，那當陣是
用牛車來載，為著莫予牛行鐵枝路，才會起這个磅空。
高雄市大樹區水寮里里長 史榮瑞
取沙仔去建造著小坪集水場的便道
必須愛經過鐵枝路下面
所以才會做這个親像磅空
對遐起去
高雄市大樹區井腳里里長 黃沼人
無意中間閣發現
這个懷疑是五分仔車的磅空
為啥物這个隧道藏佇山溝，這陣才予人發現，因為遮便若落雨，田地就會淹大水，里長佮
區公所人員開年半的時間調查，才佇山溝發現這座日本時代磅空，頭先閣掠準是防空洞，
推測磅空有三百米長，文化局初步判斷，這个磅空毋是旗尾線五分仔車路線，應該是舊產
業的痕跡。
高雄市政府文資中心主任 曾宏民
初步評估這个磅空位置
毋是日本時代糖鐵旗尾線(五分仔車)的路線
高雄市義民爺文化協會理事長 張淡英
去龍目社區揣in里長
in已經是金牌社區
阮會當佮in合作
做一个帶狀的旅遊規劃
里長表示講，因為這个上無有七十年歷史的磅空保留甲誠完整，向望未來會當知影磅空的
歷史，會當活化，通佮地方產業做連結。
洪家馨/編輯