公視新聞網 https://news.pts.org.tw/article/702969
台語歌編曲大師劉清池 提金曲獎特別貢獻獎
發布時間：2024-07-02 19:15 更新時間：2024-07-03 08:39
呂尚儒 莊浚佑 / 臺北報導
https://www.youtube.com/watch?v=oV5XgDdh0jw
第35屆金曲獎佇6/29頒獎，今年特別貢獻獎是頒予台語歌的編曲大師-劉清池，伊今年81
歲，音樂生涯有一甲子，到今嘛猶咧編曲。捌做過的歌曲有〈愛拚才會贏〉、〈酒後的心
聲〉、〈苦海女神龍〉等等，創造真濟臺灣特有的音樂旋律，劉清池嘛鼓勵少年輩的創作
者，愛保留咱的文化底蒂和對社會的關懷，才會當創造出屬於新世代的音樂。（此則新聞
標題、導言、內文皆為臺語文。）
金曲獎特別貢獻獎著獎者劉清池，「咱向望通過貢獻獎的鼓勵，來激勵閣較濟的少年輩，
愛好臺灣的音樂的工作者，來以臺灣文化做基礎，也來創作閣較濟，有新臺灣文化特色的
，台語味的臺灣音樂佮歌曲。」
臺灣的編曲大師劉清池，得著第35屆金曲獎特別貢獻獎的肯定，伊捌製作的流行歌，包括
愛拚才會贏、酒後的心聲、佮苦海女神龍等等攏真出名，遮的歌曲旋律是臺灣人的共同記
憶，嘛陪伴濟濟勞苦的百姓度過生活的難關。劉清池講伊認為，時代會改變，毋過音樂作
品猶原愛保持咱的文化底蒂、和對社會的關懷。
金曲獎特別貢獻獎著獎者劉清池，「我希望講這馬遮的較少年輩的人，伊猶原對佇台語音
樂，臺灣音樂有彼種的感想，伊會當佇這个時陣的環境，去了解著這時陣的人的心靈。」
劉清池目前蹛佇澳洲，為著金曲獎特別轉來臺灣，拜二伊來到台北流行音樂中心看展覽，
嘛和逐家分享伊所經歷的臺灣流行音樂變遷史。劉清池今年81歲，1943年佇臺北艋舺出世
，精通電子琴、吉他等等，1965年開始踏入業界，編曲的作品有上萬條，到今60年的歲月
嘛猶咧編曲。
金曲獎特別貢獻獎著獎者劉清池，「這馬少年人連台語就無啥會曉講，欲按怎講，我是期
待講in會當去改變，就是講願意投入佇這个內面，到底臺灣才是咱的根。」
劉清池認為這馬少年輩欲做臺語歌無簡單，毋過伊猶原鼓勵逐家莫放棄咱臺灣的根。
洪家馨/編輯