公視新聞網 https://news.pts.org.tw/article/704085
推動市場減用塑膠袋 高雄龍華市場代先試辦
發布時間：2024-07-09 19:15 更新時間：2024-07-09 20:10
https://www.youtube.com/watch?v=0Ps2DsYLUdM
環境部七月開始，佇各地頭推動減少塑膠袋仔的市場，高雄的示範區就是龍華市場，店家
這馬袂主動提供塑膠袋仔予消費者，鼓勵民眾家己紮環保袋仔，現場也有二手袋仔，環境
部希望，全台 臺47个市場試辦，一年會當減少20%的塑膠袋仔。
下晡時仔，濟濟人來龍華市場買菜買物件，有人會家己紮環保袋仔來裝，若是無紮袋仔嘛
無共頭家討，頭家是袂主動予你，因為龍華市場是高雄唯一試辦減塑膠袋仔的示範區，店
家袂主動提供塑膠橐仔，大多數的攤商佮民眾，攏會當接受。
民眾講:「我感覺家己紮誠好，因為按呢對世界環境攏較好。」店家講:「(人客)接受度閣
算普遍，大概百分之80攏會當接受。」
環境部是七月開始，佮全國22縣市合作，推動減塑，初步估計，若是這47个市場推廣成功
，會當減少20%買物件用的塑膠橐仔，佇龍華市場遮，環保局嘛設二手袋仔循環箱，鼓勵
民眾多多使用。
高雄市政府環保局環境衛生科科長陳皇嘉講:「佇市場出入口有設二手袋仔循環箱，民眾
會當免費使用二手環保袋仔，抑是紙袋仔來買物件。」
其實台灣有超過一半塑膠橐仔，是對傳統市場佮夜市仔來的，夜市仔煞無加入這擺減塑行
動，主要是消費型態無仝。
高雄市六合夜市自治管理委員會總幹事詹金翰講:「夜市內面攏是屬於有湯有水，甚至有
溫度，比如講燒湯，無用一个塑膠橐仔，叫伊(人客)用手提，第一个危險，嘛無方便。」
六合夜市店家講:「有人客有當時仔無方便，看敢會當斟酌使用。」
環保局表示講，會選擇龍華市場做示範區，是因為遮的消費族群，有序大嘛有少年，加上
人口嘛較濟，目前按算先試辦半冬，若是效果袂bái，才會決定欲推廣到其他的市場佮夜
市仔。
張曼亭/編輯