公視新聞網 https://news.pts.org.tw/article/704283
臺南親水公園湠規片大水薸 民眾驚會生蠓蟲
發布時間：2024-07-10 19:15 更新時間：2024-07-10 19:38
https://www.youtube.com/watch?v=02H8cLXyQjg
臺南善化東勢寮親水公園，有一个水池仔，這馬內面攏是大水薸，居民煩惱會生蠓蟲，希
望相關單位趕緊來處理。毋過天氣熱，大水薸是發誠緊，致使水質嚴重優養化。管理單位
慶濟宮就講：若欲欲總清掉，是一个大工程，經費可能是無法度負擔遐爾濟。
對這片3.2公頃的水池看過去規个青錦錦，全部攏是大水薸。遮是善化東勢寮親水公園，
逐年風颱、大水雨來，就是附近社區的抾水池，毋過這陣窟仔內的大水薸湠甲規四界，甚
至嘛有糞埽，在地居民驚生蠓蟲望趕緊清理，毋過估計愛開上百萬，管理的慶濟宮無法度
負擔。
在地居民表示：「按呢會生蠓蟲。按呢看著嘛會齷齪。」
在地居民表示：「魚仔攏去予曲去水質足bái，有偌bái你敢知？凊彩烏白挖一个軟軟的
囥咧遐，你就毋敢佇遮坐矣，因為足臭。」
東勢寮慶濟宮主委 蘇慶隆表示：「阮遮攏庄跤是作田人，逐家加減來油香爾，所以無錢
。你欲用遮毋是三五萬就用的起來的。」
因為親水公園這塊地是的慶濟宮的，雖然107年善化區公所佇周邊打造健康步道，毋過公
所回應，猶是愛由廟方管理。環保團體指出，目前遮已經嚴重優養化，加上天氣熱予大水
薸愈湠愈緊，IN認為遮愛有人長期管理才通解決這个困境。
臺南社大環境小組研究員，晁瑞光表示：「咱愛做一件代誌，就是定期愛去共做大量的清
理，留落來小部份繼續生長，伊就快速生湠的過程中會吸水中的養份，對水質是會使改善
的，但是一定愛固定的管理。」
臺南市善化區長，方澤心表示：「佇這種情況之下無法度一改共清除掉，這馬若干焦清理
一部份，過兩三工就閣生滿矣，所以就算揣著經費嘛足歹處理，所以進前有講著可能就是
愛靠天矣。」
公所指出，這改是十冬來頭一改發生，到今猶原無好的解決方式，只好聽候風颱天排出去
。抑若環團是建議會當清起來，經過曝日就會使變成有機質通做成肥料使用。
記者 李晨宇 臺南報導
陳怡臻/編輯