公視新聞網 https://news.pts.org.tw/article/704749
環境部彭啟明體驗抾回收 答應檢討回收費率
發布時間：2024-07-13 19:15 更新時間：2024-07-13 19:45
郭柏均 莊浚佑 / 台北報導
https://www.youtube.com/watch?v=wb9OVx8134M
真濟抾字紙的人，生活攏較散赤，in抾規工的回收物，可能趁無到100箍。有立法委員，
希望改善這寡第一線回收人員的勞動尊嚴，13是邀請環境部長彭啟明，做伙sak車仔，四
界抾回收，實際體驗這寡人的生活困境。環境部長彭啟明表示，會檢討現行回收費率，看
按怎來保障這寡人的收入。（這則新聞標題、前言、內文為臺語文。）
日頭曝，35度的高溫閣愛sak車仔佇路裡行，沿路抾回收，拜六立法委員邀請環境部長彭
啟明，做伙實際體驗抾字紙的生活，望提升這寡人的勞動尊嚴。
有時陣也無物件通收、真靠運氣。真無簡單共街區踅過一輾，共回收物攏搬轉去，經過分
類的工課，才通秤重、算價數。
環境部長彭啟明、立法委員洪申翰鬥陣秤回收：「32公斤 1.5箍(一公斤)，委員偌濟錢？
」「48箍，無到50箍。」
抾字紙的人水餃阿姨講：「因為阮做這較會鎮所在，會較垃圾，人會檢舉，環保(局)就開
罰單，趁無錢啦，厝邊閣感覺無好看。」
長期關注回收者議題的民間團體講，回收的價數逐年攏咧變bái，予這寡抾字紙的散赤人
真歹生活。民間團體佮立委提出訴求，希望環境部，愛檢討現行回收系統的資源分配，敢
有合理。
五角拌共同創辦人施舜仁講：「基層抾字紙的人，in拄著上大的困境，當然是回收價數的
問題，這馬的回收價數其實逐年降低，規車的回收物、規車的紙坯，可能干焦會當賣40幾
箍50幾箍，對這寡抾字紙的人，生計是真大的影響。」
環境部長彭啟明講：「咱轉去會檢討規个體系，是毋是會當閣較完善，尤其是拄講著，一
个是費率、一个是體制的健全性。」
環境部講，會檢討現行回收費率問題，未來可能用補貼、抑是調整費率等等方式，予抾字
紙的人收入有保障，方法會閣再研議。
張曼亭/編輯