公視新聞網 https://news.pts.org.tw/article/705552
拚文化奧運 阮劇團結合戲曲呈現咱平權、多元
發布時間：2024-07-18 20:13 更新時間：2024-07-19 08:33
https://www.youtube.com/watch?v=ZpDhaJykPGQ
2024巴黎奧運後禮拜就欲開始，除了運動比賽，這擺閣有「文化奧運」，世界各國用藝術
互相交流。這擺咱臺灣也受法國邀請，會佇文化奧運設臺灣館。其中由阮劇團佮5个臺灣
傳統戲曲團隊共同創作的新戲「在恁佮意」，用傳統戲曲劇情、結合現代元素，講性別、
同性婚姻的故事，透過戲劇欲予世界看著臺灣的多元佮進步。(本則新聞標題、導言、內
文皆為臺語文)
用傳統戲曲「比武招親」的劇情，來講同性婚姻的現代事，這是阮劇團主導，參其他傳統
戲曲劇團，共同創作的戲「在恁佮意」。in就欲到巴黎參加「文化奧運」，以傳統戲曲，
向國際講臺灣佇性別、人權、民主等等議題，是領先世界。
阮劇團藝術總監 汪兆謙：「臺灣的傳統戲曲內面較重要的，譬如講扮仙、譬如講比武招
親、三岔口這寡段落，重新對應到民主價值來新寫。所以講上大的挑戰其實就是講，你舊
的文本其實足封建的，但是封建內底欲按怎共伊反出一个新的價值出來」
文化奧運臺灣館策展人 林昆穎：「規个文化奧運的策劃，是包含規臺灣原汁原味 多元面
貌，所以你會當看著真重要的母語的閣再展現」
2024巴黎奧運毋但運動比賽，佇巴黎市區也有舉辦文化奧運。這擺臺灣會有倚300个動態
、靜態藝術工作者到巴黎，佇7/27~8/10，15工期間，帶來57場演出。
行政院長 卓榮泰：「一定予全世界來的各國的人士留下真深刻的印象，我想代表臺灣多
元的文化，嘛是這擺奧運的精神講號做平權、創新佮開放」
呼應奧運的主題，文化部表示，這擺的展演以自由之聲、島嶼風華、當代新藝、世界共融
四大主題，反映臺灣自由多元的社會。毋但傳統戲曲，閣有其他臺灣特色的電光舞台、辦
桌、廟埕這寡臺灣味的元素，攏會佇巴黎文化奧運現場，展予世界看、認捌臺灣。
張曼亭/編輯