公視新聞網 https://news.pts.org.tw/article/706262
臺南「風中燈牽亡歌團」 入選巴黎文化奧運演出
發布時間：2024-07-23 19:15 更新時間：2024-07-24 08:34
李晨宇 / 地方報導
https://www.youtube.com/watch?v=ki4sumjBCAo
2024巴黎奧運準備欲起鼓，咱臺灣有22組表演團隊欲去巴黎文化奧運演出，其中臺南「風
中燈牽亡歌團」入選，完成最後一改彩排。早期做牽亡歌的，佇臺南上奢颺時，一个區就
有50團，到今賰無到一半。In這回欲共上在地的表演搬到外國，予眾人感受著臺灣的多元
文化。（這條新聞標題、導言、內文是台語文。）
前場的法師當咧唸咒開路關、穿古早衫的老婆、結彩球的的小旦、若尪姨倒退行，閣愛有
後場伴奏，一團牽亡歌上基本愛五个人組合。早期佇臺灣西半部攏通看著牽亡歌的跤跡，
這馬較罕看著矣。這个歌團這陣當咧進行上尾一改的彩排，因為月底in欲去巴黎，到時欲
佇文化奧運的舞台，共百冬歷史喪葬文化原汁原味展予全世界的人看。
民眾：「這種傳統一般佇外口是看袂著，因為愛有人倩出去搬才有，臺北嘛無人咧用。」
風中燈牽亡歌團成員：「緊張啊，足緊張驚表演了無好勢。」
風中燈牽亡歌團成員：「拄仔好有這个機會，食到這个年歲有法度為國家，予全世界知影
講有咱這个臺灣。」
根據了解，牽亡歌是無仝的陣頭佮民間的風俗濫做伙所形成的，其實上起頭是做喜事的，
後來當地人才共18嬈關尪姨的故事轉型做喪事。較早上濟干焦一个下營就有40-50團，到
今全臺南賰無到一半。風中燈牽亡歌團團長講，時代變化，造成逐家對這項文化產生誤解
，其實真正的意思就是欲共亡魂tshuā路，嘛會當安慰著家屬。
風中燈牽亡歌團團長 林宗範：「勸亡就是勸亡魂愛放下，世間無論啥物人，有偌勇壯、
偌好額、偌好命攏愛死，(牽亡歌)最大的目的，欲消敨咱人的情緒，其實嘛是咧tshuā家
屬行過這个悲傷的關卡。」
林宗範老爸 林俊良：「臺灣毋干焦會當做半導體爾，咱嘛有的一寡文化的底蒂、傳統文
化，尤其咱的文化內底攏有教育意義的。」
這改歌團是以「拚，出海」做主題，表演的成員講，In做夢嘛無想過，罕得幾時會當共本
土的傳統文化紮去國外。這嘛成做一个文化外交，予國際的人知道臺灣是多元的國家。
陳稷安/編輯