公視新聞網 https://news.pts.org.tw/article/708147
教保員遊行爭取權益 促教育部重視工作環境
發布時間：2024-08-03 19:15 更新時間：2024-08-03 19:38
郭柏均 莊浚佑 / 台北報導
https://www.youtube.com/watch?v=9HBF8FKPSNY
教保員是照顧囡仔真重要的角色。但是全國幼教產業工會指出，教保員的工時、申訴等等
制度，有真濟問題。初三有千五个教保員，遊行到教育部頭前，要求重視教保員的工作環
境。（這則新聞標題、前言、內文為臺語文。）
就算佇37高溫之下，全國幼教產業工會猶是對自由廣場出發，遊行到教育部、表達訴求。
有教保員講，教保員比照勞基法，做穡四點鐘愛歇睏30分鐘；但是照顧囡仔無法度歇睏，
這30分鐘也無法度報加班，感覺真無合理。
教保員吳小姐：「教保員有tshuā班，也有兼老師的工課；若是教保員離開囡仔，這30分
鐘教室賰一个老師，咧顧全部的囡仔，其實是無符合師生比。若拄著任何狀況，教保員敢
通講我咧歇睏，我敢攏無責任？」
初三全國幼教產業工會，號召一千五百个教保人員上街遊行、討公道。in舉例，教保員若
認為考核結果無合理，就算想欲向地方、中央提出申訴，但是定予行政機關認為，考核是
內部管理問題，無屬於政府管轄範圍，無法度得著勞資以外，第三方的公正單位處理。
全國幼教產業工會理事長許文菁講：「阮捌有會員，請育嬰留停假、請產假，予人評考績
乙等，為啥物無法度申訴，因為教保員若是申訴，閣是由仝一批評伊考核的人去受理申訴
，這个結果敢有可能平反？根本就真困難。」
工會希望教育部成立第三方機構，通公平處理教保員的申訴案件。另外in攏總提出12項訴
求，除了工時、救濟制度，也有牽涉年資、歇假、補助等等問題。工會表示，台灣的教保
員制度只有上路13年，體制猶有真濟所在需要改善，才有法度共人才留牢的，提供好的幼
教品質。
張曼亭/編輯