公視新聞網 https://news.pts.org.tw/article/708397
風颱過水氣少 南部燒熱、臺南玉井衝到38度
發布時間：2024-08-05 19:15 更新時間：2024-08-06 08:19
李晨宇 / 地方報導
https://www.youtube.com/watch?v=IUBLcE8oGFY
凱米風颱過後，水氣減少，南部各地頭攏出現高溫，其中佇臺南玉井衝到38度。日頭赤焱
焱，對咱人的心臟加減有負擔，主要因為熱，人流汗會失去水份，也會流失一寡電解質。
就有醫生呼籲，愛定時補充水分，就驚脫水血會變洘，增加心梗塞佮中風的機率。（此則
新聞標題、導言、內文皆為臺語文。）
護士當咧共病人抽血欲送驗看敢有正常，像按呢因為熱著體溫懸、頭殼楞的症頭，近來看
診的人有較濟。風颱拄走水氣減少，各地氣溫攏燒烘烘，懸溫對人的心臟嘛產生負擔，臺
南市立病院心臟內科醫生指出，流汗流洘閣無補充水分，毋但會脫水，血的濃度會變甲洘
，會共血管塞咧，尤其老大人、低血壓、懸血壓族群，抑是會抱心的人攏愛注意。
民眾：「手囊愛紮矣，啉茶以外，上好愛啉一寡仔運動飲料，補充一寡仔電解質。」、「
我攏有紮茶出來，愛啉茶按呢。」
臺南市立醫院心臟內科主治醫師吳柏青表示，「像講會脫水，一寡電解質會無平衡，像講
你若脫水的時陣，水份啉無到，咱的血就會變較洘，你若心臟欲進行輸出時陣，會增加輸
出的困難度，嘛較造成血角。」
熱著分做兩類，輕度是熱衰竭會頭楞，若嚴重是著痧，體溫傷懸就有性命危險。根據衛福
部統計，全臺七月攏總有1188人熱傷害，並舊年加三百偌人。佇臺南玉井這兩個月上懸捌
測著38度，比舊年加一度。臺灣溫度有愈來愈懸的趨勢，南區氣象中心指出，20世紀百冬
內，平均溫氣溫夯1.6度。
交通部中央氣象署臺灣南區氣象中心科長洪俊煌講，「咱市區上懸溫度大概是33度34度，
毋過倚山區溫度是有較懸，有到36、37度，長期趨勢來講會愈來愈熱的感覺。毋過每一冬
熱的溫度是無蓋濟，嘛袂講逐工攏一直熱起去，可能會一兩冬會較早冷，閣會一兩冬較早
較濟按呢。」
目前臺灣南部東爿受著低氣壓的影響，初六下暗開始到這禮拜六，雲會較濟會落寡雨。毋
過醫生提醒，民眾盡量莫佇日頭下跤曝超過15分鐘較袂著痧。
曹詠涵/編輯