公視新聞網 https://news.pts.org.tw/article/709022
凱米風颱過 高雄柴山抾水池出現水泉花
發布時間：2024-08-08 19:15 更新時間：2024-08-08 21:22
https://www.youtube.com/watch?v=J0Sk_GNO6vg
凱米風颱過後，高雄柴山抾水池出現全國特有的硫化湧泉，這佮一般硫磺溫泉無仝，在地
人攏叫做水泉花，由九百外種的無仝的微生物組成的，會有一種硫化物的氣味，色水是白
色的，遮也成做全台頭一座抾水池出現硫化湧泉的奇景。（此則新聞標題、導言、內文皆
為臺語文。）
透過影像通看著，佇水底有白白的、親像是羽毛的物件，因為水流幌咧幌咧，這就是硫化
湧泉，柴山居民攏叫伊水泉花，因為伊有一種硫磺味，致使來柴山peh山民眾鼻著，掠準
是有人偷倒廢水。
民眾講：「前幾工這水攏白色的，足臭！有一个硫磺，干焦是硫磺的味，我掠準人咧排毒
氣抑是啥物。」
因為柴山的地質是珊瑚礁石灰岩，佇山跤有時陣會鼻著硫磺氣味，柴山會表示，硫化湧泉
是由九百外種微生物形成，2013年佇北壽山登山口頭一改發現，日後逐年攏有出現，干焦
2022那年，因為洘旱，無落大雨，硫化湧泉才無出現。
高雄柴山會總幹事楊聘育講：「目前佇臺灣發現的，因為冷泉，因為微生物的聚集產生的
硫化湧泉，干焦目前研究較周全的干焦柴山下跤這个爾。」
水利局表示講，今年因為凱米風颱，地下水滲出來，共硫化物、有機物等等攏濫做伙，成
做這種特殊的硫化湧泉，根據水利局的調查，柴山滯洪池的水質攏正常。
高雄市政府水利局市排一科股長曾顯琳表示，「岩層內面的的硫化物、有機物、混合物等
物質tshuā出來，產生複雜的變化，形成硫化氫氣味的硫化湧泉。」
柴山會總幹事表示講，柴山的硫化湧泉是佮一般的溫泉花無仝，便若落大雨，就會順地形
流去柴山滯洪池，也成做當地特殊的地景。
曹詠涵/編輯