公視新聞網 https://news.pts.org.tw/article/709019
《西來庵》講臺灣抗日事件 金枝演社8/9首演
發布時間：2024-08-08 19:15 更新時間：2024-08-09 09:09
呂尚儒 莊浚佑 / 採訪報導
https://www.youtube.com/watch?v=MxCFIM8t0vI
金枝演社自1993年創團以來，直直攏用台語做怹上主要的表演語言，今年的年度大戲《西
來庵》，欲佇明仔載首演。導演王榮裕表示，西來庵事件是日本統治時期，規模上大、死
傷上嚴重的民間抗爭，伊希望用台灣人毋認輸的精神，來呈現這段歷史。（此則新聞標題
、導言、內文皆為臺語文。）
表演的聲：「人的地人的厝，恁侵門踏戶閣威脅恐喝，這毋是野蠻人才做會出來的代誌。
」
臺灣抗日歷史當中的余清芳，伊是1915年西來庵事件tshuā頭的領導者，最後予日本政府
掠起來判死刑。今年金枝演社以「西來庵」做戲齣的名，欲演出這段日本時代，臺灣規模
上大的民間抗爭。
表演的聲：「余清芳害死王爺公，王爺公無保庇，害死蘇阿志。」
佇臺灣話內底用洗的講法，流傳這段歷史。導演表示因為余清芳捌利用王爺信仰、賣符
仔水等等招民眾起義，佇歷史上較有爭議，毋過伊佇戲內想欲強調的是臺灣人面對高壓統
治，彼種勇敢抗爭的精神。
金枝演社導演王榮裕講，「哪有遮戇的人啦，哪有按呢賣符仔趁錢，伊就去享受就好矣，
伊是按怎來咧做革命抗日的事件？抗日事件是愛刣頭的呢，哪有人為著咧趁遮的錢。原來
伊賣符仔是為著抗日的基金，伊欲募款就著按呢啦。所以對我來講伊雖然是諞仙仔，但是
我感覺伊是足勇敢，毋驚死的諞仙仔。」
導演表示，西來庵和余清芳的故事足罕得有人提來做戲齣，毋過伊認為囥到這个時代來看
歷史，其實也會當看出臺灣人毋認輸的個性，其實到今攏無改變過。王榮裕表示，「清朝
時代有人咧講臺灣人足歹管的，三年一小反，五年一大亂，到今猶閣是按呢。你看進前閣
有青島東，猶閣有進前咧有彼號太陽花，嘛有彼號啥咧紅衫軍，所以臺灣人實在是有這个
個性，毋認輸啦。毋認輸的個性，我感覺這是誠好的。」
導演指出以《西來庵》這齣戲，伊已經想20冬矣，總算欲佇8/9~8/11咧臺北表演藝術中心
演出。導演嘛講西來庵除了余清芳，嘛呈現真濟無仝族群、無仝階層的百姓日常，劇團希
望招逐家做伙來看遮的小人物，咧殖民統治下底，無仝的想法佮夢想。
曹詠涵/編輯