公視新聞網 https://news.pts.org.tw/article/709312
民團收集麻袋 中高齡婦女做環保手工再就業
發布時間：2024-08-10 19:15 更新時間：2024-08-10 19:44
郭柏均 林郁凱 / 台北報導
https://www.youtube.com/watch?v=6EhrPlaiMo8
有民間團體收集咖啡廳進貨咖啡豆，尾手無需要的麻布袋仔，交予社區的婦女團體，予in
共這寡麻布袋仔再利用，毋但環保，也幫助中高齡婦女二度就業。（這則新聞標題、前言
、內文為臺語文。）
用力共麻布拆開，縛做花蕊的模樣，用糊仔黏咧，廢棄的麻布、就成做美麗的花蕊。這个
民間團體，長期利用咖啡廳進貨咖啡豆的的麻布袋仔，予社區的中高齡婦女團體做成袋仔
、尪仔等等物品販賣，毋但環保，也幫助婦女二度就業。
蘆葦女力創辦人康淑華講：「廢棄的咖啡豆袋仔，咱閣再連結社區的手作團體，鬥陣達成
三个議題，第一是環境永續，同時也是中高齡婦女的再就業，閣有手作團體通繼續成長。
」
有學者認為，民間團體予本成就有技術的中高齡婦女，透過社區團體連結，通有機會重新
接觸職場，閣再展現家己的技術、賣物件，是開創閣較濟婦女二度就業的可能性。
臺灣大學社工系副教授陳怡伃講：「（二度就業)傳統的方法，攏是用幫助做出發點，針
對較弱勢、無競爭力的所在補強；但是我佇蘆葦女力看著其他可能性，佮真濟在地團體、
在地組織合作，所以若是遮本成，已經有一陣婦女咧做裁縫，抑是本成就有一陣婦女對學
習新的工藝有興趣，按呢咱就來合作。」
初十民間團體，佇台北市艋舺有新的據點開幕，遮販賣中高齡婦女做的產品，婦女也通佇
這个店頭做工作人員，遮就成做in二度就業的出發點。民間團體表示，社區有真濟婦女手
做團體真有才調，只是欠缺發展的機會，透過這款方法，通帶動環保、就業、婦女公益等
等議題。
張曼亭/編輯