公視新聞網 https://news.pts.org.tw/article/709373
第25屆台語文化營 分享野外煮食佮生活撇步
發布時間：2024-08-11 19:15 更新時間：2024-08-12 09:25
李晨宇 / 地方報導
https://www.youtube.com/watch?v=oRrtrnwVDig
台灣羅馬字協會，連紲25冬，逐年攏會辦「世界台語文化營」，今年以野外求生做主題，
教大人囡仔欲按怎佇野外煮食佮生活。（此則新聞標題、導言、內文皆為臺語文。）
囡仔用台語成做魔術師，干焦靠一張牌施魔法，就通共規副固定好勢；嘛有囡仔用白話字
造詞畫尪仔，展現課程所學著的成果。為著欲共台語向下釘根，台灣羅馬字協會對1995年
辦世界台語文化營到今。今年第25屆，以非常時期的野外求生做主題，打造全台語的環境
，嘛培養囡仔母語意識。
囡仔表示：「我學用台語變魔術，等一下欲展予逐家看，我感覺真趣味。」
家長，杜先生表示：「我一个囡仔今年欲上國小矣，予伊知影講其實有足濟囡仔，嘛是咧
講台語的，伊熟似一寡大人，用無仝的議題(來分享)。」
台灣羅馬字協會理事長，蔣為文表示：「臺灣這幾年拄著中國軍事的威脅，咱嘛愛準備，
萬一中國若是真正侵略咱臺灣，咱臺灣佇戰爭的時期，欲按怎佇野外求生。」
課程毋但安排專題演講，咧紹介國內外戰爭的歷史。另外，嘛邀請南北二路長期咧推sak
台語文的有志來分享經驗。台灣羅馬字協會常務理事陳金泉指出，因為受著殖民佮政治的
因素，致使台語有一段足長的斷層，加上家長無注重，尾手in對教會拓展到社區咧推sak
。另外，嘛有協會用語言行銷的方式，設計趣味的手路，欲唌人來學習。
台灣羅馬字協會常務理事，陳金泉表示：「少年人攏差不多袂曉講，毋但少年人和較年長
的，有的嘛袂曉講，因為按呢的關係，所以整個語言的意識會當提懸，予遮的人民攏知影
，台語是遮爾要緊的物件。」
打狗台語文促進協會理事，吳家銘表示：「共台語文當做產品，這就是一个行銷的手路，
去佮其他的物件就是去比並，有一个較趣味較活跳，較無仝款的方式。」
三工兩暝的文化營，分做大人佮囡仔組，攏總上百人來參加。主辦單位指出，向望台語文
成做生活化，母語的前途，才會當光明大葩尾。
陳怡臻/編輯