公視新聞網 https://news.pts.org.tw/article/709372
治警事件展覽延到8/18 看臺灣人按怎追求自由
發布時間：2024-08-11 19:15 更新時間：2024-08-12 09:23
呂尚儒 / 採訪報導
呂尚儒 許猛／台北報導
https://www.youtube.com/watch?v=p1pZmCaCd2o
臺灣新文化運動紀念館，舊年推出「治警事件百年紀念展」，因為反應袂bái，所以館方
宣佈延長展覽的時間。現場有設計記者日誌，欲予逐家以記者的身份，來看日本時代的「
臺灣民報」，按怎紀錄治警事件這段歷史。（此則新聞標題、導言、內文皆為臺語文。）
導覽員：「葉榮鐘是啥人我愛先介紹一下。葉榮鐘，林獻堂的秘書，然後就交代伊(葉榮
鐘)趕緊去共別人講，然後葉榮鐘就騎鐵馬，到上近的一个車站，應該是追分車站，然後
就趕緊衝到臺北去。」
透過導覽老師，說明日本政府逮捕濟濟臺灣議會請願人士以後，臺灣智識份子採取的行動
。日本時代臺灣的智識份子，為著欲爭取地方自治，發起臺灣議會請願運動，佇1923年成
立「臺灣議會期成同盟會」，煞予總督府以違反「治安警察法」掠起來。臺灣新文化運動
紀念館規畫的「治警事件百年紀念展」，展覽以當時的報紙「臺灣民報」做基礎，tshuā
民眾用記者的角度來看規个事件。
臺灣新文化運動紀念館館員，王力緯表示：「治警事件內底，伊就是逐字稿，逐字稿記錄
譬如講，法官講啥、辯護士講啥、被告講啥，甚至講檢察官伊烏白講，伊攏寫落來。所以
講咱會當根據遐的資料，會當整理出這擺展覽足濟物件。」
臺灣新文化運動紀念館指出，和當時日本人辦的報紙「臺灣日日新報」立場相對立，「臺
灣民報」是日本時代1923年第一份臺灣人辦的報紙，徛佇臺灣人的立場為臺灣人發聲，勇
敢批評時政、推廣文化、介紹新思想。臺灣文化協會嘛佇各地設立「讀報社」，讀報紙予
民眾聽。
臺灣新文化運動紀念館館員，王力緯表示：「因為咱的捌字率無懸，所以講in想足濟辦法
，譬如講有一个足趣味的物件，叫做讀報社，譬如講英國發生啥物代誌，美國發生啥物代
誌你攏會知，伊閣會買日本的報紙，予逐家知影無仝的觀點，一件代誌無仝的觀點，予臺
灣人的智識會當成長，攏免費的。」
臺灣新文化運動紀念館表示，展覽自舊年開幕到今已經欲一年，毋過因為民眾反應袂bái
，今欲閣延長到8/18，現場有設計「記者日誌」手冊、嘛用AI技術重現歷史，館方欲招民
眾做伙來了解當時臺灣人追求自由和自治的決心。
陳怡臻/編輯