公視新聞網 https://news.pts.org.tw/article/709544
歌仔戲舞台劇 《孟婆客棧》前傳登國家戲劇院
發布時間：2024-08-12 19:15 更新時間：2024-08-13 08:30
鄭亞宣 許猛捷／台北報導
https://www.youtube.com/watch?v=L2a2K5rOWGw
金鐘獎提著創新獎的電視劇 《孟婆客棧》，是台灣頭一齣結合歌仔戲佮音樂劇的新型的
歌仔戲，這馬這齣劇欲對電視搬到國家戲劇院。 《孟婆客棧》推出劇場版全新的前傳，
由唐美雲歌仔戲團揣原班人馬、閣結合一陣少年輩的演員，做伙將電視劇延續做舞台劇。
（此則新聞標題、導言、內文皆為臺語文。）
「死愛錢，死愛錢，壓霸狡怪死愛錢！死愛錢，死愛錢，壓霸狡怪死愛錢！」
電視劇孟婆客棧，2022年入圍四項金鐘獎，為著欲傳承臺灣本土的歌仔戲。這擺唐美雲戲
劇團，tshuā一陣少年輩的演員，做伙共電視劇延續做舞台劇。
孟婆客棧演員蔡振南講：「唐美雲歌仔戲團員攏一寡少年人，所以毋但愛學演戲跤步手路
，閣愛會曉講台語，這是一个真好的展現臺灣文化一个重要的任務。」
頭一改接觸歌仔戲舞台劇的演員方宥心，伊講伊佇9歲就開始參加台語歌曲比賽，而且嘛
演過足濟齣台語戲劇。伊認為家己的台語不止仔輾轉，毋過接觸歌仔戲了後，閣予伊感覺
台語誠困難。
孟婆客棧演員方宥心表示，「真濟我直接看著字的時陣，我讀攏直接是讀咱平常時講話彼
種字、彼種音，毋過結果發現毋是，伊愛用歌仔戲的戲文的聲調去練，所以我其實是直接
去拜託劇團內面的台語老師，拜託伊唸予我聽。」
舞台劇的孟婆客棧，內底除了有原本電視劇的演員以外，閣加上一陣少年演員，唐美雲希
望會當替歌仔戲注入新的活水。
唐美雲歌仔戲團團長唐美雲講：「當然拄開始袂曉，但是慢慢仔一直接觸、一直學習，in
就會愈來愈內行，愈來愈清楚，愈來愈會曉。」
唐美雲希望逐家會當鬥陣來支持本土戲劇歌仔戲，若是袂曉台語的朋友，抑是外國朋友嘛
會當來看戲。in會那搬戲，那提供華語字幕。電視演出真成功的孟婆客棧，這改11月份欲
佇國家戲劇院演出，無仝的表演舞台，攏是欲展現歌仔戲的媠。
曹詠涵/編輯