公視新聞網 https://news.pts.org.tw/article/709920
設計台華雙語課本 基金會教老大人寫台文字
發布時間：2024-08-14 19:15 更新時間：2024-08-15 08:34
莊浚佑 / 採訪報導
https://www.youtube.com/watch?v=BbcrGnQ0hpE
誠濟阿公、阿媽因為細漢的環境無好，無法度讀冊、學寫字，造成生活有真濟無方便。為
著欲幫助這寡老大人有正常、利便的環境，弘道老人福利基金會考慮著據點有八成的老大
人干焦會曉講臺語，所以in是設計雙語課本，教序大台文字、華語字鬥陣來學。 （這條
新聞標題、前言是臺語文。）
誠濟阿公、阿媽因為細漢的環境無好，無法度讀冊、學寫字，造成生活有真濟無方便。弘
道老人福利基金會，考慮著據點、有八成的老大人干焦會曉講臺語，所以 in 是設計雙語
課本、教序大台文字、華語字鬥陣來學。
這陣序大共鉛筆觳仔擺佇桌頂，那回答老師問題、那學寫字。特別的是，台頂的老師除了
教阿公、阿媽華語字以外，IN嘛會教in寫台文字，予這陣干焦會曉講台語的老大人，感覺
台文字足親切、嘛足好理解。
序大李阿媽：「毋捌字，想講欲學寫字按呢，寫這台語字，著較知影，較知影，你這馬若
去車頭欲去佗位，咱就知影講這个字是啥物，就行對遐去。」
序大潘阿媽表示，「寫字讀書，因為阮嘛足久無攑筆，來遮學攑筆、學畫圖，佮這寡阿媽
鬥陣相處真快樂。」
社工老師表示，據點有1/3老大人，是完全毋認字的。in毋知影家己的名，看無菜單、閣
較無法度認地名，坐火車、坐捷運四界去 tshit-thô。生活是誠無方便。弘道基金會表
示，考慮著有八成的老大人干焦聽有臺語，in才會設計雙語課本，臺語字、華語字鬥陣學
。
弘道老人福利基金會社工員 張沛萱，「因為咱遮的阿媽，有八成的阿媽攏講台語為主，
其他兩成的序大攏是講華語，所以咱教華語佮台語予in知影，in嘛較有法度去理解咱咧教
啥，嘛較接近in的生活。」
弘道基金會表示，課程結束了後 in 會出作業予阿公、阿媽轉去寫，除了是會當予序大學
寫字以外，誠濟孫仔嘛會對序大做伙學臺文字、學講臺語，除了會當增加囝孫之間的互動
，閣會使傳承母語，會當講是一兼二顧。
記者 鄭亞宣 莊浚佑 臺北報導
盧元媜/編輯