公視新聞網 https://news.pts.org.tw/article/711248
「處暑曝死鳥鼠」 臺北市上懸溫衝到37.8度
發布時間：2024-08-22 19:15 更新時間：2024-08-22 19:51
鄭亞宣 許猛／台北報導
https://www.youtube.com/watch?v=I_De7OBN40c
今仔日是24節氣中的處暑，俗語講「處暑曝死鳥鼠」，處暑雖然是秋天的第二個節氣，也
代表夏天已經行到尾仔，但台灣佇亞熱帶，所以猶是真熱，親像臺北市今仔上懸溫有到37
.8度。氣象署表示，愛等9月份透東北季風，天氣才會較涼。（此則新聞標題、導言、內
文皆為臺語文。）
臺北市的街仔路頂懸，民眾攏手提一杯涼仔，甚至閣有民眾手kuānn七杯涼的。天氣實在
是有夠熱。拜四（8/22）這工也是24節氣中的處暑。處暑是秋天的第二個節氣，也代表夏
天已經行到尾仔，只是講台灣佇亞熱帶，所以猶是真熱，無秋天的感覺，俗語講「處暑曝
死鳥鼠」。
民眾陳先生講：「我感覺最近真正足熱，攏37、38度，厝裡冷氣攏愛調到19度，一工攏啉
兩、三杯涼的。」
民眾陳先生講：一工大概三杯(涼的)左右，我攏是啉正常冰的涼的，因為天氣傷熱。」
氣象署表示，處暑過，天氣沓沓仔袂閣遐熱，但這馬氣候變遷，全球熱翕翕，加上24節氣
是對中國中原來的，和台灣地理環境無仝。氣象署指出，臺灣若是欲入秋，愛到九月透東
北季風的時，天氣才會轉涼。
氣象署預報員黃恩鴻表示：「中國古早有24節氣，代表講 (處暑) 過了後這个燒氣就漸漸
消失，就是代表迎接秋天的到位，(節氣) 主要是以中國彼爿為主，臺灣遮愛到九月了後
才開始會有冷熱交替。」
氣象署拜四嘛針對全臺各地發布柑仔色、黃色的高溫燈號，尤其是臺北地區上懸溫有到37
.8度。氣象署提醒民眾拜五的溫度猶是真懸，民眾愛預防著痧、避免熱傷害。
曹詠涵/編輯