公視新聞網 https://news.pts.org.tw/article/711950
臺南臺語月「臺語起磅」 豐富活動展府城人文
發布時間：2024-08-27 19:15 更新時間：2024-08-27 23:18
https://www.youtube.com/watch?v=zZLzCGS0U8o
臺南第6冬舉辦臺語月活動，今年串聯府城的傳統文化、地景、人物佮文本，規劃市仔、
戲劇和音樂會等多元活動，甚至閣頭一擺參在地棒球隊合作，推出無仝的互動遊戲。文化
局講，in向望臺語行向主流化。（新聞標題、導言及內文皆為臺語文）
鐵支路邊創作體 演員：「台語足媠無毋著，我共你講，佇咱臺灣這塊土地四百冬前，若
是欲做生理，你就攏愛用台語呢！」
鐵支路邊創作體用戲劇的方式，咧呈現今年臺南臺語月的多元表現形式，無論唱歌、唸詩
攏通用母語；嘛有五个表演團體，到時會用台語來搬演經典的戲齣。活動九月初七欲佇吳
園藝術中心起鼓，這回以「臺語起磅」做主題，文化局講，這代表母語繼續生湠的意涵，
推sak各種類型的活動，予各種族群攏有接觸的機會。
臺南臺語月統籌 歐雨鑫：「辦一个台語的市集，阮是做較復古的物件，比論講阮有做毛
筆的吉祥話，予逐家會當講好聽話，阮嘛有揣會曉講客語佮台語的網衝，來參逐家對談，
講伊為啥物欲用伊的語言，來做遮的物件；第二的路線就是，阮會tshuā逐家去熟似臺南
傳統的產業。」
臺南臺語月到今第六冬，是全國頭一个以語言文化做主題的活動。毋但結合傳統，嘛參在
地棒球隊規劃互動遊戲。另外，佇聯合國瀕危語言等級中，台語列做消失的第三級。有作
家認為，台語有其他語言無法度取代的情感，應該愛趕緊挽救這款局面。
鹿耳門漁夫 蔡奇蘭：「古早話（足濟）無通聽矣，這馬有一寡少年人講的台語阮聽無，
按呢慢慢仔消失，若無趕緊搶救，這就是一个死亡的語言。」
臺南市文化局長 謝仕淵：「佇40歲以下這沿，母語的普遍性較無遐懸，所以咱愛去了解
各社群文化參與的方式到底是啥，咱欲按怎去共遮的空間、較新的型態文化活動相結合。
」
今年是王育德臺語博士一百週年的紀念，市府嘛特別參成大合作欲舉辦國際研討會，欲予
逐家了解先輩過去佇台語文推sak的貢獻。
記者 李晨宇 臺南採訪報導
唐嘉良/編輯