公視新聞網 https://news.pts.org.tw/article/712535
新竹富興國小迎接新學生 行智慧門、挽智慧毛
發布時間：2024-08-30 19:15 更新時間：2024-08-30 23:28
https://www.youtube.com/watch?v=OKoM8XPsUkk
拜五（30）是學校開學的日子，新竹縣峨眉鄉富興國小今年攏總有3个幼兒園、10个一年
級新生報到，學校特別攢掛著蔥仔、芹菜的智慧門以外，閣有求智慧的智慧毛活動，用無
仝款的方式來歡迎學生，迎接新學期的來到。（新聞標題、導言及內文皆為臺語文）
迎接一年仔的新生報到，學校特別攢蔥仔和代表骨力的芹菜，予學生囡仔討一个好吉兆，
望怹未來攏會當平安順序、認真學習。
新生：「有蘋果、芹菜閣有蔥仔。（蘋果代表啥）平平安安。」
家長：「我感覺真特別，因為我有四个囡仔，哥哥目前已經六年級，六年來第一改拄著挽
智慧的活動，這是上特別的所在。」
除了智慧門以外，學校閣共鉛筆代表智慧毛，黏佇畫出來的牛身軀，予學生家己去挽、求
智慧。
新竹縣富興國小校長 范熾強：「第一个是聰明門、第二是勤奮門、第三是平安門，希望
透過這三道關卡（門），希望予學生會當愈來愈聰明；挽智慧毛是代表共智慧紮轉去厝，
希望予囡仔來學校會當愈來愈有智慧。」
校長表示，學校位置原底就算是偏鄉地區，過去逐年報到的學生數量，差不多是8─12个
人，雖然講今年有10个一年仔新生，毋過加減嘛是有受少囝化影響，學生數量確實有愈來
愈少的狀況。校長也期待，教育單位會當投入閣較濟的教育資源佇偏鄉。
記者 張君豪 新竹報導
唐嘉良/編輯