公視新聞網 https://news.pts.org.tw/article/713235
高雄3工地連紲查著水蛆 衛生局下令停工改善
發布時間：2024-09-04 19:15 更新時間：2024-09-04 20:42
https://www.youtube.com/watch?v=oQV8FPEwbYc
南台灣連紲出現高溫，高雄市衛生局發現真濟工地有積水生水蛆，其中3搭工地連紲3擺查
到水蛆，衛生局已經下令停工。另外，高雄也出現一例境外屈公病確診病例，屈公病的病
症佮傳染方式誠成天狗熱，毋過屈公病會有長時間的關節疼，嘛提醒逐家愛較注意咧。（
此則新聞標題、導言、內文皆為臺語文。）
南台灣天氣誠熱，高雄市衛生局相連紲佇天狗熱的高風險場所稽查，發現真濟工地有積水
、生水蛆，有3搭工地連紲查到水蛆，衛生局嘛下令停工改善。另外，8/30衛生局接著疾
管署通知講有一例境外屈公病確診，目前這名外籍人士已經安排蹛院，屈公病的症狀佮傳
染方式和天狗熱相像，毋過屈公病會有長時間的關節疼，提醒民眾愛注意。
衛生局稽查人員佇工地積水的所在採樣，提起來用燈火照，就發現大量水蛆，這是in佇鳳
山這个工地連紲第3擺發現湠病蠓較 gâu生的所在。稽查人員會遮爾細膩，是因為高雄市
已經3個月無出現天狗熱病例，in煩惱天氣若熱翕翕，溫度一直衝懸，一个無細膩就會出
現確診案例。
高雄市衛生局簡任技正—何惠彬講：「針對17个工地進行稽查，當中有16搭有發現天狗熱
湠病蠓幼蟲的狀況，陽性率誠懸。」
衛生局表示，頂禮拜有三个連紲3擺查著有湠病蠓風險的工地，攏已經要求停工，等噴藥
仔複查了後才會當復工。另外，8/29一位對印度來的人士佇高雄國際機場予發現有發燒的
狀況，毋過天狗熱快篩陰性，隔轉工才驗出是屈公病，衛生局除了做緊急防治處理，也安
排這位外籍人士隨蹛院治療。
高雄市衛生局簡任技正—何惠彬講：「屈公病佮天狗熱症頭是誠成，較特別的是屈公燒的
部份，感染的個案有部份會有嚴重的關節疼的狀況，關節疼可能會連續幾若個月，甚至是
1、2冬的狀況。」
屈公病今年到今全國計共有十个境外移入的案件，衛生局嘛提醒，天狗熱佮屈公病攏是蠓
仔傳播，若欲去兩種病流行所在，除了愛避免予蠓蟲咬著，嘛著注意若有相關症頭就愛緊
去病院檢查。
記者 邱紹揚 高雄報導
盧元媜/編輯