公視新聞網 https://news.pts.org.tw/article/713430
明年基本時薪調懸到190箍 一個月通趁3萬3
發布時間：2024-09-05 19:15 更新時間：2024-09-06 08:31
https://www.youtube.com/watch?v=gXGWeqlBJBI
勞動部昨昏開上低工資審議會，確定對明年元旦開始，在額勞工上低的月給，一個月薪水
愛28590箍，若做散工、算點鐘的薪水，一點鐘有190箍。有民眾詳細共算，領算點鐘的薪
水、一個月做22工、仝款做8點鐘，會當領3萬3千捅箍顛倒較濟。毋過人力銀行表示，在
額的工課贏佇較有保障，有福利、年尾賞金、嘛有機會調薪。佗一種較好，比較的面向真
濟，少年家揣頭路進前會當先思考。（此則新聞標題、導言、內文皆為臺語文。）
「飲料好矣，愛會記摵一下才啉喔！」
飲料店，是濟濟大學生做散工、趁所費的選擇。勞動部佇拜三召開上低工資審議會，確定
對明年開始，上低工資，月給的工課，一个月有28590箍。若算點鐘的工讀生，一點鐘有
190箍。
對做散工的少年人來講，有人認為算點鐘的薪水較會和，有人認為罔度會使，正式的頭路
較有前途。
工讀生林同學認為：「這馬算點鐘來講，若是你真正做足長(時間)的，一定會比月給閣較
懸。」
工讀生楊同學講：「我感覺起到190箍我猶是會去做月給，因為我感覺做月給的放假也是
會有錢，毋是有做有錢、無做無錢。」
若以一點鐘190元的散工來算，一个月仝款上班22工、做8點鐘，攏總會當領33440箍。毋
過上低工資、一个月嘛干焦2萬8千外箍左右。算算的，散工若親像趁較濟，較會和。根據
人力銀行的分析，做散工雖然較自由、薪水較懸。毋過，若以長時間來看，正式的頭路較
有保障、福利嘛會較好，而且調薪水的機會嘛可能較懸。
人力銀行經理林書講：「（算點鐘）算起來月給敢若到3萬捅，是毋是比月給的基本工
資閣較好，其實逐家可能愛閣考慮一下，就是若是工讀人員，企業予正職人員的發展，佮
職業的資源一定會是較濟的。」
人力銀行表示、有一寡工課，薪水一開始攏無懸，親像會計、生產管理、佮行銷等等。毋
過，人力銀行觀察in調薪水速度加較緊、平均佇三年內會加出20%，等於是一个月加欲
7000箍。人力銀行表示，欲選領月給的、抑是算點鐘的佗一種較好，比較的面向真濟，揣
頭路進前會當先思考。
曹詠涵/編輯