公視新聞網 https://news.pts.org.tw/article/713414
臺北建城140周年 辦紀念活動「電影中的臺北」
發布時間：2024-09-05 19:15 更新時間：2024-09-06 08:31
https://www.youtube.com/watch?v=NxFLwEtvbgs
濟濟老電影當中攏通看著無仝時代、台灣各地的人文佮地景，今年是臺北建城140周年，
臺北市文化局嘛舉辦紀念活動，以「電影中的臺北」來規畫系列活動，欲招民眾做伙來看
這17齣經典的電影，包括大俠梅花鹿、油麻菜籽、我是一片雲等等，另外也有主題講座和
靜態展覽，來看無仝時期的臺北生做啥款。（此則新聞標題、導言、內文皆為臺語文。）
台語片「龍山寺之戀」台詞：「本來這龍山寺是咱本省人的地界，外省人哪會用得來遮做
生理。」
1962年的台語片《龍山寺之戀》，電影毋但講族群的衝突，嘛通看著臺北艋舺龍山寺，廟
口藥酒擔、喝賣的生活場景。真濟電影當中攏記錄無仝時期的臺北，臺北市文化局響應建
城140周年，推出「電影中的臺北」系列活動，欲招民眾來看電影。
總策展人趙釧玲講：「比如《飲食男女》，咱對飲食文化做伙來看，臺北市無仝的都會生
活，抑是楊德昌的《海灘的一天》，對烏白拍到彩色，然後對hu-lìm-mù拍到數位，所
以咧這種無仝形式的攝影形式當中，咱就通看著真濟已經消失的臺北市的場景。」
特展包括大俠梅花鹿、油麻菜籽、我是一片雲等等，計共有17齣經典電影，文化局開放予
民眾免費注文電影票，另外猶會佇北投製片廠、西門紅樓廣場等等遮的有時代文化意義的
所在放電影、辦講座。
臺北市文化局局長蔡詩萍講：「這改阮因為時間的關係、經費的關係，檢采有機會阮閣佮
影視聽中心好好仔合作，未來看會當對影像內底，加揣出臺北的感覺。」
除了看電影，自9月初7到17咧剝皮寮原仔有靜態展覽，有瓊瑤的手稿、也有無仝時代的電
影票等等，文化局希望透過無仝方式，予民眾看著臺北的歷史變遷佮文化底蒂，嘛向望未
來會當繼續深化對臺北的認捌。
曹詠涵/編輯