公視新聞網 https://news.pts.org.tw/article/714128
臺史博「聽海湧」特展 戲齣呈現二戰真正歷史
發布時間：2024-09-10 19:15 更新時間：2024-09-10 19:34
李晨宇 / 採訪報導
https://www.youtube.com/watch?v=kKGRLPeDMWg
明年是二戰結束的80年，臺灣歷史博物館這陣當咧推sak《聽海湧》特展，主要是咧講二
戰時期臺灣成做日本殖民地的歷史故事，這回展覽是參公共電視合作，呈現濟濟《聽海湧
》戲劇內底的道具佮歷史資料，予逐家會使對戲劇行到展覽，進一步來認捌這段歷史。（
此則新聞標題、導言、內文皆為臺語文。）
日本佔領婆羅洲，當時倩訓練師共象揹大型的研路機，協助政府建設軍用設施，無偌久象
袂堪得操勞死去，換俘虜接落做，這是《聽海湧》戲劇片段，呈現出戰爭年代的艱苦。公
共電視參臺灣歷史博物館頭改合作辦這改特展，予逐家通理解劇情背後，真正的二戰時期
的歷史，另外遮嘛用拍戲的器具打造沉浸式的情境。
民眾講：「看完了後你就閣較會去思考，這馬咱家己生活環境是真正真好，你就毋免去面
對遮的人性交葛。」
國立臺灣歷史博物館館長張隆志解釋：「一方面是展出本館二戰相關的收藏佮文物，另外
一方面就是呈現聽海湧劇組非常用心所製作的道具，而且嘛是會使參觀眾互動按呢的方式
，予逐家會使重新轉去到當時的歷史現場。」
公視用四冬的時間製作這齣《聽海湧》，成做臺灣頭一部二戰的時代劇；若展覽分成三个
主題，咧講二戰時期，日本殖民地臺灣參臺灣人當中，有的愛去海外戰爭等狀況。戰爭結
束逐家煞有無仝命運，致使轉去厝內安穩過日，嘛成做是遮的台灣人上大的向望。
演員朱宥丞講：「佇戲內龜田副指揮官的命令之下，愛好好仔去教示兩个逃走的戰囚，我
感覺彼場予我印象非常的深刻，因為這是德仔伊心情轉變上明顯的所在。」
公廣集團董事長胡元輝講：「這段歷史真值得逐家去探討，嘛會使予逐家會當思考，佇按
呢的背景之下，有一个團隊來提案，感覺這是真重要會使去翕做戲劇的故事，所以今仔日
才有按呢的作品。」
特展到明年六月初八，明年嘛拄仔好是二戰結束的80週年，臺灣歷史博物館講，嘛透過這
改展覽予逐家有一个公共討論的機會。
曹詠涵/編輯