公視新聞網 https://news.pts.org.tw/article/714319
臺灣第一齣動畫長片 「魔法阿媽」欲出第二集
發布時間：2024-09-11 19:15 更新時間：2024-09-11 21:19
呂尚儒 莊浚佑 / 採訪報導
https://www.youtube.com/watch?v=IvXsSKoOgV4
1998年台灣第一齣動畫長片《魔法阿媽》，用動畫呈現臺灣的民俗文化，閣有媽孫仔之間
語言和生活習慣的衝突，是濟濟人的共同記憶。動畫團隊拍算2026年欲出第二集，導演王
小棣表示，第二集除了欲改講阿祖和乾仔孫之間的故事，嘛向望予逐家通看著這幾年來臺
灣動畫技術的成長。（此則新聞標題、導言、內文皆為臺語文。）
講著電影《魔法阿媽》，一定會想著烏貓酷羅佮演員文英阿姨的配音。1998年台灣第一齣
動畫長片《魔法阿媽》，用動畫呈現臺灣的民俗文化，閣有媽孫仔之間語言和生活習慣的
衝突，是濟濟人的共同記憶。電影到今欲26年矣，動畫團隊拍算2026年欲出第二集，導演
王小棣表示，第二集除了欲改講阿祖和乾仔孫之間的故事，嘛向望予逐家通看著這幾年來
臺灣動畫技術的成長。
第二集內底，當年的主角豆豆已經做阿爸矣，魔法阿媽嘛做阿祖。王小棣導演表示，為著
欲重現過去魔法阿媽佇日本時代的生活和語言使用，團隊原底真煩惱揣無gâu講臺語的囡
仔來做配音，佳哉猶有共學團咧維護母語的傳承。
王小棣講：「我就想講，哇！欲揣足濟囡仔講台語呢，結果阮另外一个曾培善導演伊就去
揣揣揣，講老師有矣，伊揣著台語共學團，彼工我實在……我入去彼个房間，規房間攏咧
講台語！媽媽啦、囡仔啦，實在足趣味的。」
另外，伊閣表示，《魔法阿媽》第二集嘛欲予觀眾看著臺灣動畫技術和人才佇這20幾年來
的成長，這改有真濟少年輩加入，嘛運用真濟3D的技術。王小棣講：「這馬敢若3D應該是
較簡單，攏電腦咧做，無喔！彼足長的時間，一點仔一點仔改的，希望逐家佮意看魔法阿
媽、支持魔法阿媽以外，嘛愛想著遮的囡仔，臺灣遮的愛畫動畫的囡仔，實在是真可貴！
」
團隊表示目前《魔法阿媽》第二集當咧募資，電影嘛當咧製作，拍算會佇2026年完成。導
演表示毋但希望予逐家看著臺灣故事的發展性，嘛希望觀眾做伙來支持臺灣動畫。
盧元媜/編輯