公視新聞網 https://news.pts.org.tw/article/715566
奇美病院推動「居家醫療」 到患者厝裡照電光
發布時間：2024-09-19 19:15 更新時間：2024-09-19 22:25
https://www.youtube.com/watch?v=A7tpgDDyFHY
照電光一般攏愛去病院做，臺南奇美病院為著推sak居家醫療，開發一台會使隨身紮的電
光機。最近有患者定咳嗽兼發燒，怹希望通佇厝內治療，請病院提供佇厝急症照護，醫護
人員就會出動，紮新設備替民眾攝影檢查，嘛成做全國頭一个佇厝使用電光的案例。（新
聞標題、導言及內文皆為臺語文）
75歲的阿媽當咧吊大筒，主要因為最近伊定咳嗽兼發燒，就算食抗生素效果嘛有限，醫師
建議愛做電光檢查，這陣患者毋免閣走一逝，奇美病院參業者合作，共助行器做改造，頂
頭鬥一台縮小版的電光機，佇患者厝內就通做檢查，這嘛成做全臺灣頭一例。
家屬：「佇厝內就會使就近照顧，感覺病院按呢足好的，對阮幫助真濟。」
奇美醫院放射診斷科急重症影像組組長 黃建中：「這台機器其實是奈米球管，所以伊出
來的射數出來，會比目前的電光的量閣較低，阮咧測試攏會穿防護衣去照電光，逐家毋免
煩惱，電光是袂殘留的。」
衛福部七月嘛開始試辦「佇厝急症照護計畫」，針對有肺炎、尿道感染佮有蜂岫癰的患者
，攏通申請佇厝佮機構接受治療。奇美病院講，試辦到今有18个佇厝急症照護的病人無利
便就醫，毋過若欲像阿媽免出門佇厝照電光，就愛是失能抑是愛做巴氏量表來評估。
臺南市衛生局長 李翠鳳：「我想這是足大的里程碑，醫療上咱會使確保佇居家的醫療品
質，對家屬來講嘛會使毋免走來走去；對病人來講閣較會使避免，閣入來病院了後，佇免
疫力無好的情形下，驚閣造成其他感染。」
奇美醫院整合醫療中心主任 黃建程：「這个佇厝的電光，毋但是利用佇厝內來照肺炎爾
，以後未來無方便的病人，若有肺癆欲追蹤的，攏嘛會使用這台電光來照。」
這个會當隨身紮的電光設備，病院表示，這佇緊急醫療方面嘛通運用，像講若有事故抑是
災難，醫療團隊會當隨提供準確的診斷參照護。
記者 李晨宇 臺南報導
唐嘉良/編輯