公視新聞網 https://news.pts.org.tw/article/716465
臺南西港、佳里麻仔水傷倒欉 產量上無減5成
發布時間：2024-09-25 19:15 更新時間：2024-09-26 08:41
李晨宇 / 地方報導
https://www.youtube.com/watch?v=DqTySD-w5jA
這兩個月常佇中晝過後有雷陣雨，造成臺南西港、佳里等地區種的麻仔嚴重受損，無論是
大、細欉這陣攏害了了，農會初估今年產量上少減五成。市府指出，目前農民會使去公所
提出申報，in後續會趕緊送件予中央，幫助農民度過難關。（此則新聞標題、導言、內文
皆為臺語文。）
這兩個月捷佇中晝過後有雷陣雨，造成臺南西港、佳里等地區種麻仔的農民嚴重受損，農
會預估今年的產量上少減五成。市政府指出，農民會使去公所提出申報，in會趕緊送件予
中央，幫助農民度過難關。
農民表示：「這馬已經傷慢矣！因為全部的園攏無焦，攏共浸佇遐，已經傷著伊本身的欉
身、變袂大。」濟濟農民出來喊聲，本成這陣烏麻仔通生長到參人的腰平懸，不而過煞因
為舊曆六月到今，不三時就落雨，致使早種的佮今仔種的麻仔攏水傷兼倒欉，主要因為麻
仔驚水，便若雨水傷濟袂堪得就會毋成囝。農民講，這回有影食力，是這十幾冬來上嚴重
的。
胡麻農謝帛橙表示：「逐家攏佇白露前十工就開始一直種，種落去了後一直落雨，落雨就
落甲這馬，阮逐家農民攏去公所反映，攏無愛插阮。」西港農會總幹事程淑如則表示，農
會有申報大概42公頃，毋過全西港區有一百外公頃，昨昏去看，大概田內底攏水、攏無法
度，嘛有一塊田已經足懸，嘛攏倒落去。
臺南西港、佳里、善化佮安定是種麻仔主要產地，各地頭攏陸續傳出災情，以西港來講，
初估有80公頃受影響，農會指出，若好年冬一冬會當收5萬斤，產值三百萬。不而過今年
產量估算上少減五成，這嘛連帶影響著做麻仔粉、麻仔糖的產業。
業者謝崑農講：「欲做咱在地的農產品的物件，這个季節嘛有足大的關係，若無遐的原物
料，你嘛無法度去做產品出來。」農業部農糧署南區分署長陳立儀則表示，公所共資料送
予縣市府了後，未來會共遮的資料統計，就受害面積、無收成面積達到25公頃的時陣，就
會使啟動災後救助，到現場去會勘，這部份會佇上緊的時間內完成。
農業局指出，受損的農民會使提出申報，農業部審查了後，會公告臺南市麻仔天然災後救
助的區域。另外，市府嘛會協助農民來做改作抑是休耕。
盧元媜/編輯