公視新聞網 https://news.pts.org.tw/article/716658
臺灣移工倚80萬个 民團：欲3成捌予人詐騙
發布時間：2024-09-26 19:15 更新時間：2024-09-26 22:21
https://www.youtube.com/watch?v=Ni_2Ntg3M4Q
臺灣有倚80萬个外籍移工，民間團體調查發現，有欲3成的外籍移工，佇臺灣有予人詐騙
的經驗；雖講政府、銀行有真濟防詐騙的宣導，但是因為語言袂通，怹無一定會當了解。
刑事局表示，未來會增加東南亞語言的防詐騙宣導；民間團體也參銀行合作，希望打造對
移工更加友善的金融環境。（新聞標題、導言及內文皆為臺語文）
印尼籍移工 Weede：「有人賣電腦，足俗的，兩千、兩千外，但是我佇外口看，愛兩萬外
。」
印尼籍移工Weede來台灣做看護15年，講著家己佇網路買物件予人騙的經驗，猶是感覺真
齷齪。
印尼籍移工 Weede：「為啥物足成的，但是無仝款，我趕緊拍開，毋是電腦，是一个細細
枝的電風。」
關心移工的民間團體講，因為語言袂通oh求證、讀無華文的防詐騙資訊這寡原因，移工並
台灣人，對詐騙較無警戒心，民團調查發現，有27%的移工佇台灣捌予人騙過；若以警政
署2023年的資料，全台詐欺案件有3.8萬件來看，移工受騙比例有較懸。
One-Forty創辦人 陳凱翔：「移工目前確實面臨非常嚴重的詐騙狀況，愛了解按怎預防上
新的手法，需要閣較特別製作引導移工防詐資訊抑是管道。」
刑事警察局預防科科長 林書立：「阮這馬已經開始規畫，增加移工有關，尤其目前臺灣
上濟的人口，外籍的部份是印尼，紲落來是越南，予咱的語言，會當呈現濟國語言。」
打擊詐騙，政府、銀行已經透過濟濟管道，推出防詐騙的宣傳，刑事局表示，未來也會增
加東南亞語言的宣傳，協助移工防詐騙。另外，民間團體認為，也會當佇現有、予移工參
加的課程中，增加防詐騙佮金融資訊，民間團體也認為，外籍看護工長時間陪長輩，若通
增加移工的銀行金融智識，也通預防台灣的老大人予人騙，效果是一兼二顧。
記者 郭柏均 謝季潾 台北報導
唐嘉良/編輯