公視新聞網 https://news.pts.org.tw/article/716934
母語家庭生活節 tshuā囝仔耍遊戲歡喜學台語文
發布時間：2024-09-28 19:15 更新時間：2024-09-28 19:46
郭柏均 林郁凱 / 台北報導
https://www.youtube.com/watch?v=LOnsGR2u0SM
由民間母語團體主辦的，第二屆母語家庭生活節，佇28舉行。今年的母語家庭生活節，予
囡仔透過趣味的關卡，若過關、若學台語文。母語團體希望，透過輕鬆的方式，鼓勵閣較
濟人講台語。（這則新聞標題、前言、內文為臺語文。）
民眾VS工作人員：「出門一蕊花，入門一條瓜，啥物物件是按呢？」「緊咧是啥？」「雨
傘」「足的」
學台語的孽譎仔話，這是母語團體主辦的母語家庭生活節，今年的生活節以「Log in台語
島」做主題，用若像咧耍電動、過關卡的方式學台語文，囡仔也耍的真心適。
台語路協會理事長董立玄講：「囡仔其實你只要提供伊語言的環境，伊足自然就學會曉，
上重要的環境就是佇咧厝內，所以爸母對囡仔講是第一要緊，毋但是佇咧厝內愛講台語，
阮規个社會嘛愛來共同支持
遮的台語囡仔、母語囡仔。」
李江却台語文教基金會執行長陳豐惠講：「希望這个台語島會當久久長長，而且毋是孤島
，會當一島、一島、一島，按呢共伊連起來，到尾規个台灣，會當是一个真大的台語島。
」
生活節透過市仔、課程、講座多元元素，營造自然講台語的環境，鼓勵大人囡仔共母語抾
轉來。母語團體也發現，最近愈來愈濟家長意識著母語的重要性。
家長李小姐講：「若是囡仔攏袂曉講，後擺真正無人會曉講台語矣。」
家長龔小姐講：「台語嘛是家己的語言，嘛是愛共伊學起來較好，予in知影，會曉聽、會
曉講。」
母語團體講，in的台語共學團有差不多200个母語家庭成員，真濟家長會開始參囡仔講台
語，是因為對台語有感情；但是in發現，最近愈來愈濟家長意識著，台語參文化、歷史真
搭密，因為這寡原因開始講台語，實行母語家庭。
張曼亭/編輯