公視新聞網 https://news.pts.org.tw/article/717752
頂回家具摒猶未了 高雄鼓山今閣淹水一米懸
發布時間：2024-10-03 19:15 更新時間：2024-10-03 22:47
https://www.youtube.com/watch?v=gO98mZVK1I0
風颱山陀兒今仔（3）對高雄登陸，下晡鹽埕、鼓山開始淹水，鼓山三路規條路袂輸是溪
流仝款，水上懸淹甲一米。有居民講，頂改凱米風颱來，淹水的家具就猶未摒了，這馬閣
淹去。另外，12級強風嘛共自強三路新光銀行的大門，規片搧落來。（新聞標題、導言及
內文皆為臺語文）
黃色塗水直直流，看著驚人，鼓山三路規條淹甲變鼓山河，貨車佇風雨中，水駛過去，
轎車就無遮好運，規台顧路、牢佇水裡；鼓山三路倚近抾水池邊，柴山圳規个漲起來，沿
路的人家厝嘛做大水，上懸淹甲一米，居民真無奈講，頂改七月凱米風颱才淹，家具攏猶
未摒了，這改閣淹起來。
民眾：「你看遐淹著水，頂改無擲掉，這改閣淹落去，差不多就烏有去矣。」
民眾：「蹛47冬，這改上大。」
因為山陀兒風颱，規个高雄攏是大水雨警戒範圍，生狂雨落袂停，鹽埕區嘛淹甲30公分懸
，有民眾根本袂赴反應。
民眾：「我佇遐看電視，一下仔看著爾，越頭就淹入來矣。」
繼續用水龜抽，就希望雨莫閣落；有民眾提早三工鬥好防水門，才無淹著。
民眾：「淹差不多到大腿遐，就是無頂擺遐懸，但是這擺嘛是有到大腿。」
毋但做大水，平均12級以上的風力，嘛予高雄自強三路新光銀行大門規大鉼搧倒、變形，
邊仔的門嘛規个吹破去；前鎮林森四路路樹、機車倒規排，就連電扶梯的鐵鉼搧了了；市
區招牌規大片抨落來，山陀兒損蕩高雄，等風雨過，市民準備好好整頓。
記者 洪敏真 邱紹揚 高雄報導
唐嘉良/編輯