公視新聞網 https://news.pts.org.tw/article/719355
嘉義台語季 講故事介紹在地文化兼推廣台語
發布時間：2024-10-14 19:15 更新時間：2024-10-15 08:27
林緯廷 / 地方報導
https://www.youtube.com/watch?v=cJ-Ks4_7Kyc
為著欲推廣臺語的使用，嘉義縣舊年開始舉辦嘉義台語季，今年第二屆的嘉義台語季，以
「歡迎收聽」做主題，欲用講故事的方式，推廣臺語，嘛紹介在地的文化佮故事，主辦單
位佇活動進前，專工舉辦臺語的志工培訓，提升志工用臺語講故事的能力。（此則新聞標
題、導言、內文皆為臺語文。）
「食飯用碗公，做事閃西風。」
以食為主的俗諺語，老師唸一句，下跤的學員就接一句，嘉義台語季的活動，主辦單位邀
請老師，來教活動志工學台語。有人教詞彙的念法，嘛有教講繪本的鋩角，攏是希望序大
人會當擔起傳承台語的責任。
寶島台語囡仔古組長胡沛晴講：「雖罔是講，阮是講予囡仔聽，毋過坦白講阮是講予大人
聽，大人轉去欲按怎引tshuā囡仔來認捌台語這个部份，我感覺大人確實是主角。」
嘉義市母語文化教育學會總幹事張至宏講：「序大若毋講，序細當然愈無機會講，咱用序
大牽序細來講，按呢效果應該會較好。」
上課志工許小姐講：「因為母語就是咱母親的語言，所以我想欲共這个母語的感動，傳承
予我的囡仔。」
上課的學員講，台語的學習有腔口、文字、拼音誠濟學問，透過這改台語季志工的培訓，
會當做一改來學，閣會當協助台語的推廣，是一个誠有意義的學習機會。
上課志工趙小姐講：「今仔日的活動有教台語，嘛有教欲按怎翻譯，嘛有講欲按怎來教，
閣有欲按怎講，我攏感覺足有興趣，所以今仔日來聽這个活動。」
台文作家邱嘉琪講：「雖然你看無台語漢字抑是拼音，但是佇口語這个部份，逐家攏會當
盡一寡心力來加學寡，會當講台語的故事予逐家聽。」
嘉義台語季的主辦單位表示，今年除了有利用網路的方式講故事以外，閣會佇圖書館來講
囡仔古，請技藝師傅來講工課的故事、閣請表演團體來演故事，欲透過文化的角度，
tshuā民眾來體會台語的日常生活。
曹詠涵/編輯