公視新聞網 https://news.pts.org.tw/article/719749
地動＋風颱＋中國擾臺 外國客才來550萬人次
發布時間：2024-10-16 19:15 更新時間：2024-10-17 08:43
https://www.youtube.com/watch?v=yS9UiEluPWM
臺灣今年風颱、地動，加上中國軍機佇台灣附近飛來飛去，造成來台旅遊的外國遊客大大
減少，統計到今干焦550萬人次，差交通部觀光署年初訂的1200萬的外國遊客有真大的落
差。交通部長陳世凱拜三（10/16）佇立法院接受立委質詢的時，已經將今年的目標改做
750萬人次。（此則新聞標題、導言、內文皆為臺語文。）
臺灣今年風颱、地動，加上中國軍機佇台灣附近飛來飛去，造成來台旅遊的外國遊客大大
減少，統計到今干焦550萬人次，差交通部觀光署年初訂的1200萬的外國遊客有真大的落
差。交通部長陳世凱拜三（10/16）佇立法院接受立委質詢的時，已經將今年的目標改做
750萬人次。
來自香港的一家伙仔拄落飛行機，就隨來台北的西門町tshit-thô。雖然西門町落雨，毋
過外國遊客也是真熱情！而且佇街仔路頂面凊彩問，攏是對香港來台灣tshit-thô的遊客
。
有香港民眾表示講：「因為免簽證就足方便，就會當隨時來遮。」、「來過敢若三改，風
景足好的。」
根據觀光署今年到八月份的統計，來台灣tshit-thô的外國遊客，第一名是香港、澳門，
攏總有88萬人次，第二是日本79萬人次，第三是韓國62萬人次，第四是美國，攏總有40萬
人次。加上其他來台灣tshit-thô的外國遊客，目前干焦550萬人次，差觀光署所訂的
1000萬人次，閣差真濟。
靜宜大學觀光系教授黃正聰表示：「第一个因素就是中國觀光客到目前為止攏袂當來；第
二个原因就是日本經濟狀況無好，所以日票變薄；第三大原因就是花蓮發生的地動，紲落
來就是有這个風颱、塗石流；第四个因素就是中國飛行機踅臺。」
交通部觀光署佇年初宣布今年以1200萬外國觀光客為目標，後來減做1000萬，毋過統計到
今只有550萬人次。交通部長陳世凱拜三（10/16）佇立法院接受立委質詢的時，有承認欲
達成1000萬人次有較難，重新將目標訂做750萬人次，希望明年會當落實1000萬人次的目
標。
盧元媜/編輯