公視新聞網 https://news.pts.org.tw/article/719921
總統府臺灣bàng-gà特展 支持本土創作者
發布時間：2024-10-17 19:15 更新時間：2024-10-17 23:31
https://www.youtube.com/watch?v=7fcqjRH01Wc
若講著漫畫、尪仔冊，真濟人攏想著日本或者是韓國的。實際上，臺灣這幾年累積真濟精
采的作品，比論講，已經翻譯做幾若國語言的《來自清水的囡仔》，閣有對漫畫改編做電
視劇的《神之鄉》等等，攏誠受歡迎。總統府紲落來欲佇10/19正式推出「臺灣漫畫特展
」，欲招民眾做伙來看精采的作品。（新聞標題、導言及內文皆為臺語文）
頂禮拜的雙十光雕秀，以臺灣漫畫做主題，運用燈光投影咧總統府，予逐家看著無仝時代
的經典。文化部表示，臺灣漫畫久年來，面對日本、韓國等等的強勢出口，咱猶原用咱的
故事，佇當代開創出臺灣漫畫第三波的黃金時代，文化部佇總統府特別規畫臺灣漫畫的特
展，欲予愈濟人看著臺灣精彩的作品。
文化部次長 李靜慧：「特展到年底結束了後，明年開始阮會換一个所在，用差不多三場
抑是四場，輪流繼續講咱臺灣bàng-gà的故事，予所有來總統府參觀的民眾，會當理解
講這幾年來，咱臺灣bàng-gà發生啥物代誌、這馬有啥物款新的故事。」
文化部表示，特展收集這15年來，19部臺灣漫畫，比論用大稻埕茶業歷史做題材的《異人
茶跡》、閣有臺南府城真出名的查某鬼《守娘》，也有像《神之鄉》咧講民俗信仰文化的
故事。總統府秘書長潘孟安表示，希望民眾毋但是來親近總統府，嘛通看著這幾年來臺灣
漫畫的發展。
總統府秘書長 潘孟安：「早期四格bàng-gà，一直到這馬的新臺漫規个收集，我相信攏
是會使予逐家回憶囡仔時，陪伴咱成長的故事，我嘛特別買一本《一枝（桿）秤仔》。」
潘孟安表示展覽拍算自10/19正式對外開放，抑若文化部嘛補充講，為著欲繼續支持臺灣
漫畫和創作者，後續會閣推出「新台漫計畫」，予想欲畫漫畫的人，有國家的支持。
記者 呂尚儒 莊浚佑 臺北報導
唐嘉良/編輯