公視新聞網 https://news.pts.org.tw/article/720183
台語文當興 出版社辦朗讀節用台語講萬項代
發布時間：2024-10-19 19:15 更新時間：2024-10-19 19:51
郭柏均 許猛 / 台北報導
https://www.youtube.com/watch?v=76xkN-9jDNA
講台語、當著時，有出版社發現，這幾年台語文出版愈來愈興，尤其是予囡仔看的台文繪
本，真受市場歡迎。對拜六到拜一，in舉辦台語朗讀節活動，現場毋但台語文學，也用台
語講科技、講音樂等等，鼓勵各種領域的逐个人，攏通自然講台語。（這則新聞標題、前
言、內文為臺語文。）
「哇，是足濟節車廂的火車，身軀有足濟無仝的圖，足媠的。」
手提繪本，用台語唸故事，囡仔攏真斟酌聽。這是民間出版社舉辦的「台文朗讀節」活動
，主辦單位講，因為發見這幾年台文出版愈來愈興，看著台文出版的發展性，就結合市集
、展覽、講座，舉辦全台語的「台文朗讀節」。
聯經出版總編輯涂豐恩：「這馬真正是愈來愈濟(台文出版)，有囡仔人的冊、有大人的冊
、有文學的翻譯，攏有，繪本是上濟的，因為逐家想講愛予囡仔人來讀(台語文)。」
「你咧看氣象報告，其實伊上重要的資料，是對佗位來，是對太空。」
予人號做「火箭阿伯」的國家太空中心主任—吳宗信，當咧用台語講太空科技，吳宗信講
，台語通講萬事萬項，伊鼓勵逐家佇各種領域，攏通試咧用台語講現代事，共台語多元化
，拍破逐家對台語的刻板印象。
國家太空中心主任吳宗信：「語言其實伊愛有適當的環境，佮資源來好好仔發展，所以佇
現代足濟科技，尤其科技足濟方面的發展、資訊的發展，伊有足濟新的技術，閣一寡名詞
出現，所以你若國家有一定的資源來提供，我想伊的語詞，詞庫會愈來愈濟。」
台文朗讀節連辦三工、對拜六到拜一，講座除了台語講太空，也有音樂創作、出版編輯、
世界文學、歷史思想等等，箍各種領域的專家，做陣來用台語分享，展現台語文當咧多元
發展。
張曼亭/編輯